Senat komıteti QR Joǵarǵy sotynyń sýdıalaryn taǵaıyndaý týraly máseleni qarady

ASTANA. QazAqparat - Búgin QR Parlamenti Senaty Konstıtýtsııalyq zańnama, sot júıesi jáne quqyq qorǵaý organdary komıtetiniń keńeıtilgen otyrysy ótti. Onda QR Joǵarǵy Sotynyń sýdıalary qyzmetine taǵaıyndaýlar týraly másele qaraldy.

QR Joǵarǵy Sotynyń sýdıalary qyzmetine Abaı Rahmetýlındi jáne Beıbit Shermuhametovty taǵaıyndaý týraly Qazaqstan Prezıdentiniń usynymyn Joǵarǵy Soty Azamattyq jáne ákimshilik ister jónindegi qadaǵalaý sot alqasynyń tóraǵasy Elis Ábdiqadyrov oqyp berdi.

Onyń aıtýynsha, Joǵarǵy Sot sýdıalaryna usynylǵan kandıdatýralar sot salasynyń tájirıbeli qyzmetkerleri bolyp tabylady. Usynylǵandardyń sýdıalyq eńbek ótili jetkilikti, joǵary bilikti jáne tájirıbesi mol qyzmetkerler bolyp otyr.

«Abaı Jambyluly Rahmetýlın 1965 jyly týǵan, Qazaq memlekettik ýnıversıtetin «Quqyqtaný» mamandyǵy boıynsha bitirgen. Ol advokattyq qyzmetten bastap, aýdandyq jáne oblystyq sot sýdıalaryna deıingi qyzmet laýazymdarynan ótken. 22 jyldyq eńbek ótili bar. 2012 jyldan beri Shyǵys Qazaqstan oblystyq sotynyń tóraǵasy», - dedi E. Ábdiqadyrov.

Beıbit Bekmuhametuly Shermuhametov 1962 jyly týǵan. Uzaq jyldar boıy prokýratýra organdarynda, sot júıesinde túrli basshylyq qyzmetter atqarǵan. Búgingi tańda QR Bas prokýratýrasy Sot aktileriniń zańdylyǵyn qadaǵalaý departamentiniń bastyǵy qyzmetin atqarady.

Talqylaýdan soń senatorlar eki kandıdatýraǵa da qoldaý bildirip, máseleni palatanyń jalpy otyrysyna shyǵarý týraly sheshim qabyldady.