Senat Qazaqstanda Tómen baıytylǵan ýran bankin qurýdy maquldady

ASTANA. QazAqparat - Parlament Senaty jalpy otyrysta «Qazaqstan Respýblıkasynyń Úkimeti men Atom energııasy jónindegi halyqaralyq agenttik arasyndaǵy Qazaqstan Respýblıkasynda Atom energııasy jónindegi halyqaralyq agenttiktiń Tómen baıytylǵan ýran bankin qurý týraly kelisimdi ratıfıkatsııalaý týraly» zań jobasyn maquldady, dep habarlaıdy QazAqparat.

Atap aıtqan, Halyqaralyq tómen baıytylǵan ýran banki Atom energııasy jónindegi halyqaralyq agenttikke múshe memleketterdiń atom stansalaryna ıadrolyq otyndy kepildi jetkizýdi qamtamasyz etý úshin agenttiktiń qoldaýymen qurylady jáne osy agenttikke múshe elderdiń birinde ornalasqan tómen baıytylǵan ýran qoımasyn qamtıdy. Osyndaı bankti qurý bastamasyn usynǵan agenttik operator elge birneshe talap qoıady.

«El ıadrolyq emes mártebege, ıadrolyq tsıkldiń bul bóliginde tehnologııalarǵa jáne tájirıbege, tıisti ınfraqurylymǵa, Atom energııasy jónindegi halyqaralyq agenttiktiń senimine ıe bolýǵa tıis. Bunyń barlyǵy Qazaqstanda bar, eń aldymen jınalǵan tájirıbeniń arqasynda», - dedi QR Energetıka mınıstri Qanat Bozymbaev zań jobasyn tanystyrý barysynda.

Mınıstrdiń sózine qaraǵanda, Qazaqstan iri ýran óndirýshi jáne joǵary baıytylǵan ýrandy tómen baıytylǵan ýran formasyna qaıta óńdeý múmkindikterine ıe bola otyryp, beıbit ıadrolyq energetıkany damytýǵa óz úlesin qosýǵa nıetti. 2011 jylǵy 29 shildede Qazaqstan óz aýmaǵynda tómen baıytylǵan ýran bankin ornalastyrý nıeti týraly resmı ótinimdi halyqaralyq agenttikke jiberdi. Ótinimde qarastyrý úshin eki alań usynyldy, ıaǵnı Óskemendegi Úlbi metallýrgııalyq zaýyty jáne burynǵy Semeı synaq polıgony aýmaǵyndaǵy №5  alańy qamtyldy.  2011 jyly 29 tamyzdan  2 qyrkúıek aralyǵynda Atom energııasy jónindegi halyqaralyq agenttiktiń tehnıkalyq mıssııasy qosylǵan alańdardy qarap, Úlbi metallýrgııalyq zaýytyn tańdady. Bul 65 jyldyq tarıhy bar kásiporyn, onyń 45 jyldan astam merziminde osyndaı materıalmen jumys isteý tájirıbesi bar.