Senat Qazaqstan men Tájikstan arasyndaǵy Azamattyq qorǵanys týraly kelisimdi qabyldady

ASTANA. QazAqparat - Búgin Parlament Senatynyń jalpy otyrysynda «Qazaqstan Respýblıkasynyń Úkimeti men Tájikstan Respýblıkasynyń Úkimeti arasyndaǵy Azamattyq qorǵanys, tótenshe jaǵdaılardyń aldyn alý jáne olardy joıý salasyndaǵy yntymaqtastyq týraly kelisimdi ratıfıkatsııalaý týraly» QR Zańy qabyldandy.

Kelisimge 2014 jyldyń 6 qyrkúıeginde Almaty qalasynda qol qoıylǵan. Kelisimniń maqsaty Qazaqstan men Tájikstan elderiniń quzyretti organdarynyń azamattyq qorǵanys, tótenshe jaǵdaılarynyń aldyn alý men olardy joıý salasyndaǵy yntymaqtastyq negizderin aıqyndaý bolyp tabylady.

Bul rette taraptardyń bireýiniń kúshterimen, quraldarymen joıylmaıtyn tótenshe jaǵdaılardyń paıda bolýyn nazarǵa ala otyryp, taraptardyń bireýiniń aýmaǵynda tótenshe jaǵdaılar oryn alǵan kezde osy kelisimdi júzege asyrýǵa quqyqtyq negizdi qamtý kózdeledi. Atalǵan kelisimniń kúshine enýi tótenshe jaǵdaılarǵa monıtorıng jáne boljaý jasaýǵa, tájirıbe almasýǵa, eki memlekettiń oqý oryndarynda mamandardy daıarlaýǵa óz septigin tıgizedi.

Parlament qabyldaǵan qujat Memleket basshysynyń qol qoıýyna joldanady.