Senat Qazaqstan men Qytaı arasyndaǵy Transkaspıı kólik baǵytyn damytý kelisimin ratıfıkatsııalady
Kelisim 2023 jylǵy 17 qazanda Beıjiń qalasynda jasalǵan.
Kelisimniń maqsaty — Transkaspıı halyqaralyq kólik baǵyty boıynsha mýltımodaldy tasymaldaýdy damytý úshin avtomobıl, teńiz jáne temirjol kólik túrleriniń basymdyǵyn tıimdi paıdalanýǵa járdemdesý, sondaı-aq kelisim taraptarynyń aýmaqtary arqyly júkterdi tasymaldaý úshin qolaıly jaǵdaılar jasaý.
Zańda kóliktiń retteýshi salalaryndaǵy vedomstvolar men kásiporyndar arasyndaǵy yntymaqtastyqty nyǵaıtý, kólik baǵytynyń turaqty jáne tıimdi jumys isteýin qoldaý úshin damý ortasyn birlesip qalyptastyrý, logıstıkalyq jáne kólik operatsııalaryn ońtaılandyrý, tasymaldaý ýaqytyn qysqartý, kórsetiletin qyzmetterdiń sapasyn arttyrý kózdeledi.
Kelisim Transkaspıı halyqaralyq kólik baǵyty boıynsha júk tasymaldaý kólemin ulǵaıtýǵa jáne Qazaqstan men Qytaı arasyndaǵy saýda-ekonomıkalyq qatynastardyń odan ári damýyn jaqsartýǵa múmkindik beredi.
Sonymen qatar Senat «Qazaqstan Respýblıkasynyń Úkimeti men Qytaı Halyq Respýblıkasynyń Úkimeti arasyndaǵy Transkaspıı halyqaralyq kólik baǵytyn, onyń ishinde Qytaı-Eýropa qatynasyndaǵy konteınerlik poıyzdar úshin damytý jónindegi kelisimdi ratıfıkatsııalaý týraly» zańdy maquldady.
Kelisim taraptardyń Transkaspıı halyqaralyq kólik baǵytyn damytý salasyndaǵy yntymaqtastyqqa, kólik baılanystaryn ıntegratsııalaýǵa, tasymaldardyń tıimdiligin arttyrýǵa, saýda-ekonomıkalyq jáne ónerkásiptik yntymaqtastyqqa járdemdesýge, sondaı-aq Qytaıdan Azııaǵa jáne Azııa arqyly odan ári Eýropaǵa júkterdi tasymaldaý úshin qolaıly jaǵdaılar jasaýǵa baǵyttalǵan.
Zańda Transkaspıı halyqaralyq kólik baǵyty boıynsha júkterdi tasymaldaýdyń jyl saıynǵy áleýetti kólemin boljaý, jyljymaly quramdy qadaǵalaý jónindegi derektermen almasý jáne taraptardyń aýmaqtarynda konteınerlik poıyzdar úshin eksporttyq-ımporttyq, tranzıttik tasymaldardy ulǵaıtý jónindegi yntymaqtastyqty damytý kózdeledi.