Senat Qazaqstan men DDU arasynda yntymaqtastyqty damytýǵa qatysty qujatty maquldady

<p>Búgin Senattyń jalpy otyrysynda &laquo;Astanada Dúnıejúzilik densaýlyq saqtaý uıymynyń Eýropalyq óńirlik komıtetiniń jetpis úshinshi sessııasyn uıymdastyrý týraly Qazaqstan Respýblıkasynyń Úkimeti men Dúnıejúzilik densaýlyq saqtaý uıymy arasyndaǵy kelisimdi ratıfıkatsııalaý týraly&raquo; Zańy maquldandy, dep habarlaıdy <a href="Kazinform" target="_blank" rel="noopener">Kazinform</a>.</p>

Atalǵan kelisimge Qazaqstan Respýblıkasy Úkimeti men Dúnıejúzilik densaýlyq saqtaý uıymy bıylǵy 23-shi mamyrda Jenevada qol qoıyldy.

Zańnyń negizgi maqsaty - Qazaqstan Respýblıkasy men Dúnıejúzilik densaýlyq saqtaý uıymy arasyndaǵy halyqaralyq yntymaqtastyqty damytý jáne nyǵaıtý. Bul rette, Qazaqstan Úkimeti men Dúnıejúzilik densaýlyq saqtaý uıymy arasyndaǵy Eýropalyq óńirlik komıtetiniń 73-shi sessııasyn Astana qalasynda uıymdastyrý týraly kelisimdi ratıfıkatsııalaý eskerilgen.

«Kelisimniń normalary Dúnıejúzilik densaýlyq saqtaý uıymynyń 73-shi sessııasyn ótkizýge baılanysty atalǵan uıym usynatyn materıaldyq-tehnıkalyq resýrstardy, kórsetiletin qyzmetterdi jáne quqyqtyq mártebeni aıqyndaýdy qarastyrǵan. Nátıjesinde elimiz halyqaralyq uıym jaǵynan saraptamalyq, ádisnamalyq jáne tehnıkalyq qoldaý alady, Ulttyq densaýlyq saqtaý júıesin halyqaralyq standarttarǵa saı damytady. Sondaı-aq, joǵary tehnologııalyq medıtsınalyq qyzmetterdi engizýge jáne medıtsınalyq mamandar daıarlaýǵa, tájirıbe almasýǵa múmkindik beredi», - dedi senator Aqmaral Álnazarova.

Qazaqstan Respýblıkasy 1992 jyldan bastap Dúnıejúzilik densaýlyq saqtaý uıymynyń múshesi jáne Atlant muhıtynan Tynyq muhıtyna deıingi 53 eldi qamtıtyn Eýropalyq aımaqqa kiredi.

«Osyǵan oraı Kelisim negizinde elimizde bıylǵy 24-26 qazan aralyǵynda 53 elden kelgen 600-den astam densaýlyq saqtaý salasynyń delegaty qatysqan halyqaralyq deńgeıdegi saıası-áleýmettik is-shara ótti. Kelisimdi Dúnıejúzilik densaýlyq saqtaý uıymynyń Eýropalyq óńirlik komıtetiniń 73-shi sessııasy ótkennen keıin Ratıfıkatsııalaý, qoldanystaǵy zańnamalarǵa qarama qaıshy kelmeıdi. Sebebi, Kelisimniń 17-babynyń 2-tarmaǵyna sáıkes, shart erejelerin qujatqa qol qoıylǵan kúninen bastap jáne ýaqytsha negizde kúshine engenge deıin qoldanýǵa jol beriledi. Zańdy qabyldaý, teris jáne ózge de jaǵymsyz áleýmettik-ekonomıkalyq jáne quqyqtyq saldarǵa ákep soqtyrmaıdy», - dedi depýtat.

Atap aıtqanda, bıyl 23 qazanda Memleket basshysy Qasym-Jomart Toqaev DDU Bas dırektory Tedros Gebreıesýsty jáne uıymnyń Eýropadaǵy óńirlik bıýrosynyń basshysy Hans Klıýgeni qabyldady. 

Budan buryn habarlanǵandaı, osy jyly 25 qazanda Astanada DDU Eýropalyq óńirlik komıtetiniń 73-shi sessııasy barysynda Densaýlyq saqtaý mınıstrligi men DDU Eýropa bıýrosynyń arasynda 2024-2025 jyldarǵa arnalǵan eki jyldyq yntymaqtastyq týraly kelisimge qol qoıyldy.