Senat Kaspıı teńizindegi memlekettik shekaralardy zańdy túrde bekitýge arnalǵan qujatty qabyldady
Bul shartqa 2021 jylǵy 25 qazanda Ashhabad qalasynda qol qoıylǵan.
«Sharttyń maqsaty – Qazaqstan men Túrikmenstan arasyndaǵy aýmaqtyq sýlardy jáne balyq aýlaý aımaqtarynyń shektes ýchaskelerin bólý. Túrikmenstan jaǵy atalǵan shartty bıyl 17 sáýirde ratıfıkatsııalady. Qujattyń ratıfıkatsııalanýy jáne kúshine enýi ońtústik mejelerde Qazaqstan Respýblıkasynyń memlekettik shekarasyn delımıtatsııalaý úderisin tolyq aıaqtaýǵa múmkindik beredi», - dedi QR Premer-Mınıstriniń orynbasary - Syrtqy ister mınıstri Muhtar Tileýberdi.
Shartty ratıfıkatsııalaý nátıjesi – eki eldiń memlekettik shekarasynda ózara qurmet, senim, teń quqyq, dostyq jáne yntymaqtastyq rýhynda shekaralyq máselelerdi retteý boıynsha turaqtylyqty odan ári qamtamasyz etý bolady.
Senat tóraǵasy Máýlen Áshimbaev qujat Kaspıı teńizindegi Qazaqstan men Túrikmenstan arasyndaǵy memlekettik shekara syzyǵyn aıqyndaý jáne balyq kásipshiligi aımaqtarynyń arajigin ajyratý maqsatynda ázirlengenin eske saldy.
«Osy Zań Qazaqstannyń Túrikmenstanmen memlekettik shekarasyn delımıtatsııalaý protsesin aıaqtaýǵa jáne eki memleket arasyndaǵy Kaspıı teńizindegi memlekettik shekaralardy zańdy túrde bekitýge múmkindik beredi. Aldaǵy ýaqytta zań eki el arasyndaǵy tatý kórshilik qatynasty odan ári nyǵaıtýǵa jáne ózara tıimdi yntymaqtastyqty damytýǵa yqpal etedi dep senemiz», - dedi M. Áshimbaev.