Senat ınvestıtsııalyq ahýal týraly zańnamaǵa túzetýlerdi qaraıdy
Senat Úkimettiń jáne Respýblıkalyq bıýdjettiń atqarylýyn baqylaý jónindegi esep komıtetiniń 2013 jylǵy respýblıkalyq bıýdjettiń atqarylýy týraly esepterin qaraıdy. Memleket basshysy shuǵyl dep jarııalaǵan «Qazaqstan Respýblıkasynyń keıbir zańnamalyq aktilerine ınvestıtsııalyq ahýaldy jetildirý máseleleri boıynsha ózgerister men tolyqtyrýlar engizý týraly» zań jobasyn birinshi oqylymda qaraý josparlandy.
Senatorlar Qylmystyq-protsestik kodeksiniń, keıbir konstıtýtsııalyq zańdarǵa jáne basqa birqatar zańnamalyq aktilerge qylmystyq-protsestik zańnamany jetildirý máseleleri boıynsha ózgerister men tolyqtyrýlar engizý týraly, Ákimshilik quqyq buzýshylyq týraly kodeksiniń jobalaryn, sondaı-aq keıbir zańnamalyq aktilerge ákimshilik quqyq buzýshylyq týraly zańnama máseleleri boıynsha túzetýlerdi talqylaıdy.
Odan basqa, Senat otyrysyna «Kásiptik odaqtar týraly» jáne zańnamaǵa kásiptik odaqtardyń qyzmeti jáne eńbek qatynastaryn retteý máseleleri boıynsha túzetýler jobalary (birinshi oqylymda) shyǵarylady.
Bas komıtetterdiń tóraǵalary zań jobalarynyń Senat otyrysyna ázirlik barysy týraly baıandady.
Bıýroda taıaýda Májiliste maquldanǵan zań jobalary bólinip berildi. Qarjy jáne bıýdjet komıteti keıbir zańnamalyq aktilerge ınvestıtsııalyq ahýaldy jetildirý máseleleri boıynsha ózgerister men tolyqtyrýlar engizý týraly, sondaı-aq Qazaqstan men Sıngapýr arasyndaǵy tabysqa salynatyn salyqtarǵa qatysty qosarlanǵan salyq salýdy boldyrmaý jáne salyq salýdan jaltarýǵa jol bermeý týraly úkimetaralyq kelisimge ózgerister men tolyqtyrýlar engizý týraly hattamany ratıfıkatsııalaý týraly zań jobalaryna bas komıtet bolyp belgilendi.
Konstıtýtsııalyq zańnama, sot júıesi jáne quqyq qorǵaý organdary komıteti Esirtki, psıhotroptyq zattar men olardyń prekýrsorlaryn Keden odaǵynyń keden aýmaǵy arqyly ótkizý tártibi týraly kelisimdi ratıfıkatsııalaý týraly, Qazaqstan men Halyqaralyq Qaıta Qurý jáne Damý Banki arasyndaǵy Qaryz týraly kelisimdi (Sot tóreliginiń sektoryn ınstıtýtsıonaldyq nyǵaıtý jobasy) ratıfıkatsııalaý týraly, sondaı-aq «Qylmystyq áreketten túsken tabystardy jylystatý, anyqtaý, alyp qoıý jáne tárkileý týraly konventsııany ratıfıkatsııalaý týraly» Qazaqstan Respýblıkasynyń Zańyna ózgeris engizý týraly» zań jobalary boıynsha bas komıtet bolyp belgilendi.
Al «Qazaqstan Respýblıkasynyń keıbir zańnamalyq aktilerine elektr energetıkasy máseleleri boıynsha ózgerister men tolyqtyrýlar engizý týraly» zań jobasy boıynsha Ekonomıkalyq saıasat, ınnovatsııalyq damý jáne kásipkerlik komıteti bas komıtet bolyp belgilendi.
Bas komıtetterge Senat komıtetteriniń usynystaryn jınaqtaý jáne qorytyndy ázirleý tapsyryldy.
Bıýro qaýlysymen Senattyń 2014 jylǵy negizgi sharalar josparyna ózgerister engizildi.