Senat halyqaralyq bankke qatysty eki qujatty maquldady
Birinshisi — «Eýropa qaıta qurý jáne damý bankin qurý týraly kelisimniń 1-babyna bank operatsııalaryn geografııalyq qamtýdy Saharadan ońtústikke qaraı ornalasqan Afrıka elderi men Irakqa shekteýli túrde jáne birtindep qoldanýdy júzege asyrýǵa múmkindik beretin túzetýlerdi ratıfıkatsııalaý týraly» Zańy.
Zańnyń maqsaty — Bankke múshe memleketterdiń, sondaı-aq ekonomıkalyq saladaǵy alýshy elderdiń halyqaralyq yntymaqtastyǵyn keńeıtý.
Senator Sergeı Karplıýktiń aıtýynsha, Eýropa qaıta qurý jáne damý bankine 72 el men 2 uıym múshe retinde tirkelgen.
Senattyń Qarjy jáne bıýdjet komıteti málimetine qaraǵanda, qujat aıasynda Bank qyzmetin jańa elderge taratý eskerilgen. Bul óz kezeginde Banktiń qazirgi elderin qoldaý qabiletin tómendetpeıdi, sondaı-aq onyń AAA deńgeıindegi kredıttik reıtıngine qaýip tóndirmeıdi.
— Qazaqstan úshin Afrıkany bank operatsııalary aımaǵyna qosý mıllıardtaǵan halqy bar elderdiń jobalarymen baılanys ornatýda jáne ınvestıtsııalardy júzege asyrýda jańa múmkindikter ashady, — delingen komıtet aqparatynda.
Sonymen qatar senatorlar «Eýropa qaıta qurý jáne damý bankin qurý týraly kelisimniń 12-babynyń 1-tarmaǵyna jaı operatsııalarǵa jarǵylyq kapıtaldy shekteýdiń kúshin joıý maqsatyndaǵy túzetýlerdi ratıfıkatsııalaý týraly» Zańyn maquldady.
Zańnyń maqsaty — Eýropalyq qaıta qurý jáne damý bankiniń kredıtke qatysty qyzmetin tıimdi josparlaý.
— Zańnyń mindeti — EQQDB-nyń Basqarýshylar Keńesinen Dırektorlar keńesine Bank kapıtalynyń jetkiliktiligi normatıvteriniń tıisti deńgeıin belgileý jónindegi ókilettikterdi berý. Bul turǵyda jaı operatsııalarǵa jarǵylyq shekteýlerdi alyp tastaý jáne Dırektorlar keńesine kapıtaldyń jetkiliktiligi normatıvteriniń tıisti deńgeılerin belgileý múmkindigin berý Banktiń jedel sheshim qabyldaýyna jáne óziniń kredıttik qyzmetin josparlaýyna múmkindik beredi. Ekinshiden, Dırektorlar keńesi deńgeıinde kapıtaldyń jetkiliktiligi normatıvterin retteý Bank kapıtalyn paıdalanýdyń tıimdiligi men ıkemdiligin arttyrady. Úshinshiden, qaralyp otyrǵan túzetýlerdi qabyldaý Banktiń Qazaqstannyń ekonomıkalyq mańyzy bar jobalary úshin qarjylandyrý máselelerin jedel sheshýine múmkindik beredi, — dep atalyp ótken Senattyń Qarjy jáne bıýdjet komıteti málimetinde.
Budan buryn habarlanǵandaı, 2024 jyly kúzde EQQDB Kókshetaýda 630 oryndyq aýrýhana salýǵa qarjy bóletini málim boldy.