Senat Frantsııamen arada jańartylatyn energııa kózderine qatysty qujatty maquldady

<p>ASTANA. KAZINFORM &ndash; Búgin Senattyń jalpy otyrysynda &laquo;Qazaqstan Respýblıkasynyń Úkimeti men Frantsýz Respýblıkasynyń Úkimeti arasyndaǵy jahandyq jylynýǵa qarsy kúres salasyndaǵy yntymaqtastyqty iske asyrý týraly arnaıy kelisimdi ratıfıkatsııalaý týraly&raquo; Zańy maquldandy.</p>

Zańnyń maqsaty - 2022 jylǵy 30 qarashada Parıjde jasalǵan arnaıy kelisimdi ratıfıkatsııalaý. Kelisimniń negizgi mindeti - Qazaqstan Respýblıkasynyń aýmaǵynda jańartylatyn energııa kózderi, ornyqty damý salasyndaǵy iri jobalardy ilgeriletý, ázirleý jáne iske asyrý arqyly jahandyq jylynýǵa qarsy kúrestegi yntymaqtastyqty júzege asyrý.

Senattyń Agrarlyq máseleler, tabıǵatty paıdalaný jáne aýyldyq aýmaqtardy damytý komıtetiniń málimetinshe, qujat Qazaqstan men Frantsııanyń energetıkalyq qaýipsizdik salasyndaǵy maqsattaryna, basymdyqtary men mindettemelerine qol jetkizýge, ekologııalyq taza tehnologııalarǵa kóshýge jáne shyǵaryndylardy qysqartýǵa járdemdesetin jobalardy ilgeriletýge baǵyttalǵan.

Kelisim aıasynda iri jobalardy iske asyrý josparlanǵan. Máselen, qujatta Jambyl oblysy Mırnyı kentiniń aýmaǵynda jalpy qýaty 1 GVt jel energııasyn paıdalanatyn gıbrıdti elektr stantsııasyn iske asyrýdy, ázirleýdi, salýdy jáne paıdalanýdy kózdeıtin Mırnyı jobasyn iske asyrý eskerilgen. Bul jobany iske asyrý jańartylatyn energııa kózderi sektoryn damytýdy jalǵastyrýǵa, nysanaly ındıkatorlarǵa qol jetkizýge, sondaı-aq jyl saıynǵy kómirqyshqyl gazynyń shyǵaryndylaryn keminde 2 mln tonnaǵa qysqartýǵa múmkindik beredi. Mırnyı jobasy 250 turaqty jumys ornyn, 2500 ýaqytsha jumys ornyn qurýǵa jáne 820 mlrd teńgege jýyq ınvestıtsııa tartýǵa múmkindik beredi.

Kelisimdi ratıfıkatsııalaýdan kútiletin nátıje - BUU júıesi aıasynda klımattyń ózgerýine qarsy kúres salasyndaǵy ámbebap halyqaralyq sharttar boıynsha Qazaqstan Respýblıkasynyń halyqaralyq-quqyqtyq mindettemelerin iske asyrý.