Senat depýtaty óńirlik rámizderdi jasaý men qoldanýdyń biryńǵaı erejelerin bekitýdi usyndy

ASTANA. QazAqparat – Senat depýtaty Nurtóre Júsip oblystyq deńgeıde geraldıkany qoldanýdy retteıtin normalardyń bolmaýyn synǵa aldy, dep habarlaıdy QazAqparat tilshisi.

Premer-Mınıstrine joldaǵan depýtattyq saýalynda N. Júsip oblystar men qalalardyń eltańbalary azamattardyń patrıottyq sanasyn damytýǵa yqpal etetinin aıtty. Biraq bul sala esh zańmen rettelmegen.

Depýtattyń aıtýynsha, ákimdikterdi óńirlik rámizderge qatysty memlekettik stıldi saqtaýǵa jáne júzege asyrýǵa mindetteıtin biryńǵaı erejeler men ádistemelik nusqaýlar joq.

«Mádenıet jáne sport mınıstrliginiń 2015-2022 jyldary júrgizgen monıtorıngteri tıisti ákimshilik-aýmaqtyq birlikteriniń óńirlik rámizderin ázirleý, bekitý, qoldaný jáne paıdalaný júıesiniń áli durys rettelmegenin kórsetip otyr. Qazirgi tańda Qazaqstandaǵy 20 oblystyń 13-inde, 3 megapolıste, 186 aýdannyń 137-inde, 89 shaǵyn qalanyń 33-inde óz rámizderi bar. Biraq óńirlik rámizderdi bekitý tártibi zańmen rettelmegen», -dedi senator.

Depýtat bul olqylyqtyń ornyn toltyrý úshin óńirlik rámizderdi bekitý, qoldaný, ornatý, ornalastyrý jáne paıdalaný boıynsha normatıvtik-quqyqtyq aktiler men nusqaýlyqtardy qabyldaý mańyzdy ekenin atap ótti jáne «Qazaqstan Respýblıkasyndaǵy jergilikti memlekettik basqarý jáne ózin-ózi basqarý týraly» zańǵa tıisti ózgerister engizýdi usyndy.

Foto: senate.parlam.kz