Senat depýtaty Munaıly aýdanyndaǵy ortalyq aýrýhananyń qurylysymen tanysty
Aýrýhananyń qurylys aýmaǵy 6 gektarǵa jýyq. Onda 5 negizgi ǵımarat pen qosalqy sharýashylyq nysandary boı kóterip jatyr. 150 oryndyq kópbeıindi aýrýhananyń birneshe blokqa bólingen ǵımarattarynda hırýrgııa, terapııa, juqpaly aýrýlar jáne balalarǵa arnalǵan bólimder, perzenthana jáne zerthana bolady. Aýdandyq jańa aýrýhana 2024 jyly iske qosylady dep josparlanǵan.
Bekbol Orynbasarov merdiger mekemeniń ókilderimen de kezdesti. Qurylystyń sapasyn, bólingen qarajattyń tıimdi ıgerilýin basty nazarda ustaýdy qajettigin jetkizdi.
Sondaı-aq 4 shildede Mańǵystaý oblystyq máslıhatynyń tóraǵasy Jańbyrbaı Mataevpen birge Aqtaý qalalyq jáne Munaıly aýdandyq máslıhatynyń depýtattarymen bas qosty.
Bekbol Tileýmuratuly palata qabyrǵasyndaǵy jumystar baǵyty men qabyldanǵan jańa zańdarǵa toqtalyp, elimizde júrgizilip jatqan konstıtýtsııalyq reformalar týraly aıtyp berdi.
Júzdesý barysynda depýtattar zańdaǵy olqylyqtarǵa ózgerister engizýdi jáne óńirdiń áleýmettik-ekonomıkalyq damý keleshegin, turǵyndardyń ál-aýqatyn kóterý, onyń ishinde kópbalaly jáne az qamtylǵan otbasylarǵa memlekettik qoldaý kórsetý, mindetti áleýmettik-medıtsınalyq saqtandyrý, sý, jumyssyzdyq, elektr qýaty, jol, karer, jerasty sýlary máselelerin aıtyp, talqylap, usynys-pikirlerin jetkizdi.