Senat depýtattyǵyna kandıdattardyń jeke saılaý qory 14 mln. teńgege jetýi múmkin - OSK

ASTANA. QazAqparat - Senat depýtattyǵyna kandıdattardyń jeke saılaý qory 14 mln. teńgege jetýi múmkin. Búgin Ortalyq kommýnıkatsııalar qyzmetinde 1 qazanda ótetin Senat depýtattarynyń saılaýyna arnalǵan brıfıngte Ortalyq saılaý komıssııasynyń tóraǵasy Qýandyq Turǵanqulov osylaı málim etti.

OSK tóraǵasynyń sózine qaraǵanda, Senat depýtattyǵyna kanıdıdattardyń úgit naýqanyn qarjylandyrý eki jolmen júzege asady. Onyń birinshisi - memlekettiń respýblıkalyq bıýdjetten beriletin kepili.

«Respýblıkalyq bıýdjetten biz kandıdattyń telearnadan 15 mınýt, radıodan 10 mınýt sóz sóıleýin, merzimdi baspasózden eki maqalasynyń shyǵýyn, tańdaýshylarmen kezdesý úshin zaldy jalǵa alý aqysyn jáne tıpografııalyq-plakattyq ónimderdi shyǵarýdy qamtamasyz etemiz, kólik shyǵyndaryn da kóteremiz», - dedi Qýandyq Turǵanqulov. Onyń aıtýynsha, bul shamamen 390 myń teńgeni quraıdy jáne bul úgit jumystaryn júrgizýdiń eń tómengi shyǵyn deńgeıin qamtıdy.

Bul rette OSK tóraǵasy saılaýdyń óńirlerde ótetinin aıta kele, barlyq úgit jumystary aımaqtarda júzege asatynyn, sondyqtan da, oblystyq saılaý komıssııalary oblystyq, óńirlik BAQ-pen kelisimsharttarǵa otyratynyn atap ótti.

«Ekinshi qarjylandyrý joly - kandıdattyń jeke saılaý qory arqyly júzege asyrylýy múmkin. Saılaý qory da eki kózden quralady, onyń biri kandıdattyń jeke qarajaty bolsa, ekinshisi zańdy jáne jeke tulǵalardyń qoldaý qarajattary. Bul shamamen 14 mln. teńgeni quraıdy. Bul qarajatty kandıdat zańnama aıasynda óziniń úgit jumystaryn kúsheıtý úshin jumsaı alady», - dep atap ótti Q. Turǵanqulov.

Eske sala keteıik, Memleket basshysy «Qazaqstan Respýblıkasy Parlamenti Senatynyń depýtattaryn saılaýdy 2014 jylǵy 1 qazanǵa taǵaıyndaý týraly» Jarlyqqa qol qoıǵan bolatyn.