Senat depýtattarynyń saılaýy: Bir orynǵa úsh úmitker bar
«2020 jylǵy 24 shildedegi jaǵdaı boıynsha, elimizde Senat depýtattyǵyna saılaý komıssııalary 58 kandıdatty tirkedi. Ortasha alǵanda bir orynǵa úsh úmitker bar», - dedi QR Ortalyq saılaý komıssııasynyń tóraǵasy Berik Imashev.
Onyń sózine qaraǵanda, óńirler arasynda eń kóp kandıdattar sany Nur-sultan qalasynda jáne Aqmola oblysynda – 5 adam tirkelgen. Kandıdattardyń ortasha jasy - 50,9.
Senat depýtattyǵyna kandıdattar arasynda áıelderdiń saıası belsendiligi saqtalǵanyna toqtalǵan ol: «tirkelgen kandıdattardyń arasynda 10 áıel adam bar, ıaǵnı 17,2 paıyzdy qurady. Ótken saılaýmen salystyrǵanda, bul kórsetkish shamamen eki esege ósti», - dedi.
Aıta keteıik, osy jyldyń 12 maýsymynda Memleket basshysy Qasym-Jomart Toqaevtyń Senat depýtattarynyń saılaýyn 2020 jylǵy 12 tamyzǵa taǵaıyndaý týraly qaýlysy shyqqan edi.
Osyǵan oraı QR Ortalyq saılaý komıssııasynyń onlaın rejımde otyrysy ótip, onda saılaýǵa qatysty kúntizbelik is-sharlar jospary bekitilgen. 13 maýsymnan bastap Senat depýtattyǵyna kandıdattardy usyný bastaldy. Sondaı-aq úmitkerlerge qoıylatyn talaptar jarııa etildi.