Senat depýtattary saılaýynda «Barlyǵyna qarsymyn» jolaǵy bola ma

ASTANA. QazAqparat – Qazaqstandyqtar 2023 jyly 14 qańtarda ótetin Parlament Senaty depýtattaryn saılaýda barlyq kandıdatqa qarsy daýys bere ala ma? Bul saýalǵa Ortalyq saılaý komıssııasynyń hatshysy Muhtar Erman jaýap berdi, dep habarlaıdy QazAqparat tilshisi.

«Saılaý týraly zańǵa sáıkes daýys berý bıýlletenderin ázirleý jáne ony toltyrý erejesin Ortalyq saılaý komıssııasy bekitedi. Saılaý ádil ári ashyq ótýi úshin bıýlletenderdi daıyndaýda qorǵanys máselesine erekshe mán beriledi. Bıýlletende kandıdattardyń aty-jóni memlekettik jáne orys tilinde kórsetiledi. Sondaı-aq, bıýlletende kandıdattardyń «barlyǵyna qarsymyn» grafasy bar. Bıýlletender ár óńirdegi daýys berýshilerdiń sanyna qaraı daıyndalady», - dedi Muhtar Erman Ortalyq saılaý komıssııasynyń otyrysynda.

Onyń aıtýynsha, Saılaý týraly Konstıtýtsııalyq zańnyń talaptaryna sáıkes bıýlletender ornalasqan mekemeniń esigi mórlenedi jáne ishki ister organdarynyń baqylaýynda bolady.

«Saılaý týraly Konstıtýtsııalyq Zańnyń 24, 25, 26-baptaryna sáıkes Parlament Senaty depýtattaryn saılaýda daýys berýshilerdiń tizimin oblystyq, respýblıkalyq mańyzy bar qalalar men el astanasy máslıhat hatshysynyń usynýy boıynsha aýmaqtyq saılaý komıssııasy jasaıdy», - deıdi ol.

Buǵan deıin Senat depýtattyǵyna kandıdattardyń 95,5%-y ózin-ózi usynǵany týraly habarlaǵan edik.

Aıta keteıik, búgin Senat depýtattyǵyna kandıdattardy tirkeý aıaqtaldy.

Eske salsaq, 2023 jyldyń 14 qańtarynda elimizdiń 20 óńirinen bir-bir Senat depýtatyn saılaý ótedi.