Senat depýtattary Qyzdar ýnıversıtetiniń ujymymen kezdesti
Depýtattar Memleket basshysy Nursultan Nazarbaevtyń «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty bıylǵy Joldaýynyń mazmunyn talqylaý, jan-jaqty túsindirý úshin keldi.
Alqaly jıyndy Qyzdar Ýnıversıtetiniń rektory Gaýhar Aldambergenova ashyp, júrgizip otyrdy.
«Bıyl Qazaqstan Respýblıkasynyń Prezıdenti - Elbasy Nursultan Ábishuly Nazarbaev Qazaqstan halqyna dástúrli Joldaýyn joldady. «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty bıylǵy Joldaý jetistikke jetý jolyn aıqyndaǵan mańyzdy ári aıtýly qadam boldy. Bıylǵy Joldaýdy ásirese, elimizdegi ustazdar qaýymy zor qýanyshpen qabyldady. Buǵan sebep te joq emes. Memleket basshysy mańyzdy qujattyń «Turmys sapasyn arttyrý» atty ekinshi basymdyǵynda joǵary bilim berýge qatysty, pedagog mártebesi jaıynda birqatar mańyzdy mindetterdi atap ótti. Atap aıtqanda, 2019 jyly «Pedagogtardyń mártebesi» týraly Zań qabyldanady. Bul - qazaqstandyq ustazdar qaýymynyń qoǵamdaǵy bedelin arttyryp, ornyn aıshyqtaýǵa zor qadam bolmaq. Búgin Qyzdar Ýnıversıtetiniń proffesor-oqytýshylary men stýdentterine Joldaýda qarastyrylǵan mańyzdy máseleler men basymdyqtardy júıeli ári naqty tanystyrý maqsatynda elimizdegi eń joǵary zań shyǵarýshy organ - Qazaqstan Respýblıkasynyń Parlament Senatynyń depýtattary Baqytjan Tursynuly, Dınar Júsipáliqyzy jáne Tóleýbek Tóleýuly arnaıy kelip otyr», - dedi Gaýhar Aldambergenova.
Alǵash bolyp sóz alǵan Parlament Senatynyń Áleýmettik-mádenı damý jáne ǵylym komıtetiniń múshesi, Senat depýtaty Baqytjan Jumaǵulov Elbasy Joldaýynda aıtylǵan aýqymdy jumystardy ret-retimen túsindirdi. Sonymen qatar, joǵary oqý oryndarynyń sapasyn arttyrý, ustaz mártebesin kóterý jaıynda da keńinen toqtalyp ótti.
«Biz ózimiz bala kezimizden ustaz degen qaýymǵa qurmetpen qarap óskenbiz. Ustazdar kele jatqanda jol berip, ornymyzdan turatynbyz. Sońǵy jyldary ustazdyń deńgeıi qoǵamda tómendep ketti. Oǵan barlyq qoǵam kináli. Elbasy tapsyrmasymen biz ustazdyń mártebesi jaıly zań qabyldaımyz. Bul zańǵa sáıkes, ustazdardyń mártebesin, jumysyn, qyzmetin, jabdyqtalýyn, materıaldyq ahýalyn túgel ózgertý kerek. Sizderdiń oqý oryndaryńyzda múmkindigi shekteýli balalarǵa arnalǵan ortalyq bar eken. Qandaı tamasha. Onda pedagog, psıholog mamandar tájirıbeden ótedi. Sonymen qatar, kelesi jyl Jastar jyly retinde belgilendi. Jastardyń jaǵdaıyn kóterý úshin ne isteý kerek? Jas abıtýrıentterdiń pedagog mamandyǵyna túsýi úshin qandaı jaǵdaı jasaý kerek? Osy máseleler tolyǵymen qaralady», - dedi Baqytjan Jumaǵulov.
Qyzdar pedagogıkalyq ýnıversıtetiniń mártebesi jaıly Senattyń Áleýmettik-mádenı damý jáne ǵylym komıtetiniń múshesi, Almaty qalasynan saılanǵan Parlament Senatynyń depýtaty Dınar Nóketaeva baıandady.
«Búgin biz tarıhı turǵydan mańyzy zor oqý ornynyń biri - Qyzdar pedagogıkalyq ýnıversıtetinde júrmiz. Bul oqý ornyna 70 jyl boldy. 1944 jyly ashylǵan. Osy ýaqyt aralyǵynda 70 000 asa pedagog maman daıyndap shyǵarǵan. Elbasynyń joldaýy negizinen pedagogtarǵa baǵyttaldy. Onyń ishinde eń tómengi jalaqyny 28 000 teńgeden 42 myń teńgege jetkizý týraly aıtyldy. Eń bastysy, pedagogtardyń mártebesin kóterý jaıly aıtty. Úkimetke naqty tapsyrma berildi. Parlament qazir osy zań jobasyn daıyndaýǵa ázir. Zań ishinde pedagogtardyń burynǵy mártebesin qaıtarý, jalaqysyn kóterý, tikeleı mindetinen tys jumystardan aryltý týraly aýqymdy mindetter tur», - dedi Dınar Nóketaeva.
Alqaly basqosýdy Gaýhar Aldambergenova qorytyndylap, halyq qalaýlaryna erkin formattaǵy mazmundy áńgimesi úshin ýnıversıtet ujymynyń atynan alǵys bildirdi. Oqý orny rektorynyń aıtýynsha, Memleket basshysynyń Joldaýynda kóterilgen mańyzdy máselelerdi ýnıversıtettiń professor-oqytýshylary men stýdentteri qyzý talqylady. Professor-oqytýshylar men bilimgerler strategııalyq mańyzdy qujatta kórsetilgen mindetterdi saralap, tyń oılary men ıdeıalaryn júzege asyrýǵa nıetti. Bul tarapta arnaıy keshendi jospar qabyldanady. Ol Prezıdent tapsyrmalarynyń oryndalýyn, oqý ornynda jaıly orta qalyptastyrýyn jáne oqytýshylardyń kásibı deńgeıin anyqtaýdy qamtamasyz etetin bolady.
«Memleket basshysy usynǵan Joldaý Qazaqstan damýynyń jańa baǵytyn kózdeıdi. Ondaǵy basymdyqtar men mindetter Qazaqstannyń áleýmettik-ekonomıkalyq jáne tehnologııalyq turǵyda jańǵyrtýdyń logıkalyq jalǵasy ispettes. Jáne ol el damýy men turaqtylyǵyn qamtamasyz etetin uzaq merzimdi damý strategııasyna sáıkes keledi. Sonymen qatar, Joldaý memleketimizdiń álemdegi tehnologııalyq, ekonomıkalyq jáne áleýmettik salalardaǵy tereń jáne qarqyndy ózgeristerge beıimdelýine sep bolady», - dedi G. Aldambergenova.