Senat depýtattary memlekettik satyp alý rásimderiniń sapasyn arttyrý máselesin talqylady

<p>ASTANA. KAZINFORM &mdash; Senattyń Ekonomıkalyq saıasat, ınnovatsııalyq damý jáne kásipkerlik komıtetiniń depýtattary satyp alynatyn taýarlardyń, jumystar men kórsetiletin qyzmetterdiń sapasyn arttyrýǵa, shamadan tys reglamentteýdi boldyrmaýǵa, satyp alý rásimderin odan ári avtomattandyrýǵa jáne jeńildetýge, satyp alý jónindegi biryńǵaı platforma qurýǵa baǵyttalǵan zańdardy qarady. Bul týraly Senattyń baspasóz qyzmeti málim etti.&nbsp;</p>

«Memlekettik satyp alý týraly» jáne oǵan ilespe «Qazaqstan Respýblıkasynyń keıbir zańnamalyq aktilerine satyp alý máseleleri boıynsha ózgerister men tolyqtyrýlar engizý jáne artyq zańnamalyq reglamentteýdi boldyrmaý týraly» zańdarda qoǵamdyq baqylaý bólikterin engizý, satyp alý rásimderin ońtaılandyrý jáne qysqartý múmkindigi sııaqty jańalyqtar bar. Sonymen qatar shaǵyn satyp alýdy jedel atqarý úshin bir kózden satyp alý múmkindigi de kózdelgen. Budan basqa, qujattarda affılıırlengen kompanııalardyń satyp alýǵa qatysýyn jáne sharttyq mindettemelerdi tıisinshe oryndamaǵan ónim berýshilerdiń jaýapkershiligin shekteý sharalaryn kúsheıtý, sondaı-aq shaǵym berý tártibin jáne olardy qaraý merzimderin qaıta qaraý da kózdelip otyr», - delingen habarlamada.

Depýtattar sondaı-aq «Qazaqstan Respýblıkasynyń Ákimshilik quqyq buzýshylyq týraly Kodeksine ózgerister men tolyqtyrýlar engizý týraly» zańdy da qarady. Qujat ónim berýshiniń memlekettik satyp alý týraly shart jasasýdan jaltarǵany týraly málimetterdi usynbaǵany nemese ýaqtyly bermegeni, sondaı-aq ónim berýshini josyqsyz dep taný úshin sotqa ýaqtyly jolyqpaǵany úshin tapsyrys berýshige jaýapkershilik júkteıdi.

Komıtet músheleri talqylaý qorytyndysy boıynsha zańdardy Palata otyrysynda qaraý týraly sheshim qabyldady.