Senat tsıfrlyq tehnologııalardy retteıtin zań qabyldady
«Tsıfrlyq tehnologııalardy retteý máseleleri boıynsha» zań jobasy Memleket basshysynyń 2019 jylǵy 2 qyrkúıektegi Joldaýyna sáıkes ázirlendi. Ózderińizge belgili, Elbasynyń bastamasymen «Tsıfrlyq Qazaqstan» baǵdarlamasy qabyldandy. Bul baǵdarlama 2 jyl ishinde elimizdi tsıfrlandyrýdyń draıverine aınaldy. Osyǵan oraı, zań jobasy tsıfrlandyrý protsesin odan ári damytýǵa úlken serpin beredi. Zań jobasy, eń aldymen, tsıfrlyq tehnologııalardy damytýǵa, jáne olardy qoldanýmen baılanysty qatynastardy retteýge baǵyttalǵan», - dedi qujatty senatorlarǵa tanystyrǵan QR Tsıfrlyq damý, ınnovatsııalar, aeroǵarysh ónerkásibi mınıstri Asqar Jumaǵalıev.
Onyń atap ótýinshe, birinshiden, zańnamalyq deńgeıde tsıfrlyq aktıv, maınıng, token uǵymdaryn, sondaı-aq blokcheın tehnologııasyn anyqtaý jáne tsıfrlyq aktıvti múlikke jatqyzý usynylady. Sonymen qatar, «Zııatkerlik robot» uǵymyn aıqyndaý jáne robot ıesiniń jaýapkershiligin bekitý kózdeledi.
«Ekinshiden, tsıfrlandyrý nátıjesinde taldaýdy qajet etetin úlken derekter qory qalyptasty. Osyǵan oraı, zań jobasymen «Úlken derekterdi» taldaý mehanızmin retteý usynylady. Bul Smart Data Ukimet jobasy negizinde ekonomıkalyq kórsetkishterdi taldaý arqyly tıimdi Úkimettik sheshimderdi qabyldaýǵa múmkindik beredi. 2018-2019 jyldary Smart Data Ukimet jobasy aıasynda qarjy, bilim berý, áleýmettik jáne densaýlyq saqtaý salalarynda 187 mlrd teńge shamasynda ekonomıkalyq áser berdi. Atap aıtsam, qarjy salasynda qosymsha túsimder, densaýlyq saqtaýda dárilik zattardy durys bólý arqyly boldy. Osyndaı naqty mysaldar bilim berý, áleýmettik salalarda da ekonomıkalyq áserin kórsetti. Biz bul jumysty basqa da memlekettik organdarmen jalǵastyramyz», - dedi mınıstr.
Ol úshinshiden, Memleket basshysy Tsıfrlandyrý jónindegi otyrysta barlyq qujat aınalymyn elektrondy formatqa kóshirýdi tapsyrǵandyǵyn aıtty.
«Bul máseleni sheshý úshin Tsıfrlyq qujattar servısin engizý usynylady. Atalǵan servıs «Mobıldi úkimet» qosymshasynda kórsetiledi. Tórtinshiden, azamattardyń derbes derekterin qorǵaý memleket paryzy. Osyǵan oraı, tsıfrlyq tehnologııalardy engizý azamattardyń derbes derekterin qorǵaýdy talap etedi. Ol úshin derbes derekterdi qorǵaý salasyndaǵy ýákiletti organdy anyqtaý usynylady. Odan basqa, osy saladaǵy «Erikti kıbersaqtandyrý» qyzmeti engiziledi. Besinshiden, qoǵamdyq quqyqtyq tártipti qamtamasyz etý maqsatynda ulttyq beınemonıtorıng júıesiniń erejelerin reglamentteý usynylady. Bul júıeni qurý búgingi kúni «aqyldy qalalar» jobasyn iske asyrý sheńberinde tıimdilikti kórsetip otyr. Respýblıkanyń barlyq aýmaǵynda beınemonıtorıng júıesin engizý quqyq buzýshylyqty ýaqytyly anyqtaýǵa múmkindik beredi», - dedi ol.
Mınıstr altynshydan, otandyq IT-kompanııalardy damytý úshin memlekettik organdar kásipkerlik qyzmetpen aınalyspaýy qajettigin aıtty.
«Osyǵan oraı, tsıfrlyq jobalardy qurý jáne damytý úshin kvazımemlekettik sektor fýnktsııalaryn alyp tastaýdy usynamyz. Sondaı-aq, venchýrlik qyzmetti yntalandyrý maqsatynda «Jeke venchýrlik ınvestordy» aıqyndaý jónindegi normalardy engizý josparlanýda. Osylaısha, atalǵan normalardy engizý 2024 jylǵa qaraı ınnovatsııalyq startap kompanııalar sanyn ulǵaıtýǵa múmkindik beredi. Budan basqa, zań jobasymen elektrondyq ónerkásip salasyndaǵy ýákiletti organ aıqyndalady», - dedi Asqar Jumaǵalıev.