Senat bıýrosynyń otyrysynda palatanyń aldaǵy otyrysynyń kún tártibi bekitildi
Onda Parlament Májilisinde maquldanǵan zań jobalary Senattyń turaqty komıtetteri men palata Apparatyna bólinip berildi. Bul týraly Senattyń baspasóz qyzmetinen habarlandy.
Atap aıtqanda, «Qazaqstan Respýblıkasynyń keıbir zańnamalyq aktilerine qorǵalǵan baılanys máseleleri boıynsha ózgerister men tolyqtyrýlar engizý týraly» zań jobasyn odan ári jetildirý jumystary boıynsha bas komıtet bolyp Halyqaralyq qatynastar, qorǵanys jáne qaýipsizdik komıteti belgilendi. Osy komıtetke Ujymdyq qaýipsizdik týraly shart uıymynyń ujymdyq qaýipsizdik júıesi kúshteri men quraldarynyń qarý-jaraǵy men áskerı tehnıkasynyń tehnıkalyq jáne aqparattyq úılesimdiligin qamtamasyz etý týraly Hattamany jáne Ujymdyq qaýipsizdik týraly shart uıymyna múshe memleketterdiń áskerı maqsattaǵy ónimderdi ázirleý, jasaý, paıdalaný, jóndeý, jańǵyrtý, paıdalaný merzimin uzartý jáne kádege jaratý salasyndaǵy yntymaqtastyǵy týraly kelisimdi ratıfıkatsııalaý týraly zań jobalary da berildi.
Konstıtýtsııalyq zańnama, sot júıesi jáne quqyq qorǵaý organdary komıtetine «Qazaqstan Respýblıkasy men Úndistan Respýblıkasy arasyndaǵy Azamattyq ister boıynsha quqyqtyq kómek kórsetý týraly shartty ratıfıkatsııalaý týraly» jáne «Taýar tańbalary jónindegi zańdar týraly Sıngapýr shartyn ratıfıkatsııalaý týraly» zań jobalary berildi.
Bıýro otyrysynda bıylǵy 1 naýryz kúni bolatyn Senattyń kezekti otyrysynyń kún tártibine usynystar da qaraldy. Josparlanǵan otyrysta halyqaralyq kelisimderdi ratıfıkatsııalaýǵa qatysty birqatar zań jobalary qaralatyn boldy.
Depýtattardyń talqysyna «Ujymdyq qaýipsizdik týraly shart uıymy ujymdyq qaýipsizdik júıesiniń kúshteri men quraldary quralymdarynyń mártebesi týraly kelisimdi ratıfıkatsııalaý týraly», «Ujymdyq qaýipsizdik týraly shart uıymy ujymdyq qaýipsizdik júıesiniń kúshteri men quraldarynyń qalyptastyrylý jáne jumys isteý tártibi týraly kelisimdi ratıfıkatsııalaý týraly» jáne «Ujymdyq qaýipsizdik týraly shart uıymynda áskerı maqsattaǵy ónimderdi shyǵarý jónindegi memleketaralyq ǵylymı-óndiristik birlestikterdi qurýdyń jalpy prıntsıpteri týraly kelisimdi ratıfıkatsııalaý týraly» zań jobalary usynylatyn boldy.
Otyrys barysynda «1992 jylǵy 15 mamyrdaǵy Ujymdyq qaýipsizdik týraly shartqa qatysýshy memleketter arasyndaǵy Áskerı-tehnıkalyq yntymaqtastyqtyń negizgi prıntsıpteri týraly kelisimge ózgerister engizý týraly Úshinshi hattamany ratıfıkatsııalaý týraly» zań jobasy da qaralady.