Senat Bıýrosy Elbasynyń Parlamenttiń birlesken otyryynda belgilegen mindetterine arnaldy
Senat Tóraǵasy Qasym-Jomart Toqaev Parlament qaraýyna ınstıtýtsıonaldyq reformalardy odan ári qamtamasyz etýge jáne keshendi áleýmettik-ekonomıkalyq is-sharalardy iske asyrýǵa baǵyttalǵan 50-ge jýyq zań jobasy kelip túsetinin aıtty. Birneshe zań jobasy jospardan tys engiziletin bolady. Olardyń ishinde elimizdiń qaýipsizdigin nyǵaıtýǵa baǵyttalǵan, qysqa merzimde qabyldaýdy qajet etetin zańdar da bar. «Biz, árbir zań jobasyn muqııat talqylap, qabyldanatyn zańdardyń sapasyna erekshe mán berip, Úkimetpen tyǵyz jumys jasaýymyz qajet. Bul rette, Elbasynyń naqty tapsyrmasy bar», - dep atap ótti Tóraǵa.
«Jańa parlamenttik maýsymda biz qabyldanǵan zańdar boıynsha halyqqa keńinen túsindirý jumystaryna den qoıatyn bolamyz. Elbasy aıtqandaı, «zańdy qabyldaýdyń qajettiligi men barlyq logıkasy qazaqstandyqtarǵa túsinikti bolýy mańyzdy», - dedi Q.Toqaev. Osyǵan baılanysty Senat basshysy áriptesterin buqaralyq aqparat quraldarymen baılanysty odan ári jetildirýge, zańdardyń erekshelikterin túsindirýge, sondaı-aq óńirlerge sapar barysynda qabyldanǵan zańdardy halyqqa túsinikti túrde nasıhattaýǵa aıryqsha mán berýge shaqyrdy.
Otyrys barysynda Bıýro músheleri 15 qyrkúıekte bolatyn Senat otyrysynyń kún tártibin talqylady. Palata, atap aıtqanda Almaty oblysynan saılanǵan senator Nurlan Qylyshbaevty Senattyń turaqty komıtetiniń quramyna saılaý týraly máseleni qaraıdy. Odan basqa, Respýblıkalyq bıýdjettiń atqarylýyn baqylaý jónindegi esep komıtetiniń músheleri qyzmetterine Senat Tóraǵasy usynǵan Aleksandr Gorııaınov pen Talǵat Jaqannyń kandıdatýralaryn talqylaý Qarjy jáne bıýdjet komıtetine tapsyryldy.
Senat otyrysynyń kún tártibine Qazaqstan men Aýǵanstan arasyndaǵy Azamattyq qorǵanys, tótenshe jaǵdaılardyń aldyn alý jáne olardy joıý salasyndaǵy yntymaqtastyq týraly úkimetaralyq kelisimdi ratıfıkatsııalaý týraly zań jobasy da engizildi.
Áleýmettik-mádenı damý jáne ǵylym komıteti «1994 jylǵy 15 sáýirdegi Uly Otan soǵysynyń qatysýshylary men múgedekterine, basqa memleketterdiń aýmaǵyndaǵy urys qımyldaryna qatysýshylarǵa, qaza tapqan áskerı qyzmetshilerdiń otbasylaryna arnalǵan jeńildikter men kepildikterdi ózara taný týraly kelisimge ózgerister men tolyqtyrýlar engizý týraly hattamany ratıfıkatsııalaý týraly» zań jobasyna bas komıtet bolyp belgilendi.