Senat avtorlardyń múliktik quqyqtaryna qatysty zańdy qabyldady

NUR-SULTAN. QazAqparat - Parlament Senatynyń jalpy otyrysynda palata depýtattary «Avtorlyq jáne sabaqtas quqyqtardy ujymdyq negizde basqarý tártibi týraly kelisimdi ratıfıkatsııalaý týraly» Zańdy qabyldady, dep habarlaıdy QazAqparat tilshisi.

Atalǵan kelisimge Eýrazııalyq ekonomıkalyq odaq elderiniń vıtse-premerleri 2017 jylǵy 11 jeltoqsanda Máskeýde qol qoıdy. Bul kelisim Odaq aýmaǵynda quqyqtardy ujymdyq basqarý arqyly qazaqstandyq avtorlardyń múliktik quqyqtaryn qamtamasyz etýge baǵyttalǵan. Óz kezeginde, Odaqqa kiretin memleketterdiń avtorlarynyń múliktik quqyqtary Qazaqstan Respýblıkasy aýmaǵynda qamtamasyz etiletin bolady.

«Avtorlardyń Eýrazııalyq ekonomıkalyq odaq aýmaǵynda syıaqy alý quqyǵy is júzinde ujymdyq basqarý arqyly júzege asyrylady. Osyǵan baılanysty, Kelisim ujymdyq basqarý uıymdarynyń negizgi qaǵıdattaryn, quqyqtary men mindetterin, olardy memlekettik baqylaý nysandaryn belgileý arqyly ujymdyq basqarýdyń jalpy tásilderin retteıdi», - dedi QR Ádilet vıtse-mınıstri Natalıa Pan.

Onyń sózine qaraǵanda, qujat aıasynda avtorlarǵa jınalǵan syıaqyny bólý jáne tóleý, mindetti aýdıt júrgizý, ujymdyq basqarý uıymdarynyń mindetterdi oryndamaǵany úshin jaýapkershiliktiń negizderi qarastyrylady. Kelisimge sáıkes, uıymdar jınalǵan syıaqy somasynyń elý paıyzyna deıin óziniń shyǵystaryn jabýǵa jáne arnaıy qorlar úshin ustap qalýǵa quqyly. Alaıda, ár múshe memleket óz zańnamasynda mundaı ustap qalýdyń eń tómengi shekti jalpy mólsherin belgileı alady. Mysaly, elimizdiń ulttyq zańnamasyna sáıkes, uıymdardyń shyǵystaryn jabýǵa arnalǵan somalar jınalǵan syıaqynyń jalpy kóleminiń otyz paıyzynan aspaýǵa tıis.

Budan bólek, kelisimde rettelmegen máseleler múshe memleketterdiń ulttyq zańnamasyna sáıkes sheshiletin bolady.