Senat asyl tuqymdy mal sharýashylyǵy damytýǵa qatysty qujatty qabyldady

NUR-SULTAN. QazAqparat – Parlament Senatynyń jalpy otyrysynda «Eýrazııalyq ekonomıkalyq odaq sheńberinde aýyl sharýashylyǵy janýarlarymen selektsııalyq-asyl tuqymdyq jumys júrgizýdi birizdendirýge baǵyttalǵan sharalar týraly kelisimdi ratıfıkatsııalaý týraly» Zańy qabyldandy, dep habarlaıdy QazAqparat tilshisi.

Kelisim múshe memleketterde aýyl sharýashylyǵy janýarlarymen selektsııalyq-asyl tuqymdy jumys júrgizý tártibin retteıdi jáne Eýrazııalyq ekonomıkalyq odaq aıasynda asyl tuqymdy mal sharýashylyǵy naryǵyn damytýǵa jáne ózara saýdadaǵy kedergilerdi joıýǵa baǵyttalǵan.

«Kelisimdi ázirleý jumysy 2014 jyldan bastap Eýrazııalyq ekonomıkalyq komıssııanyń jumysy aıasynda júrgizilgenin, jumys tobynyń eskertýlerin eskere otyryp, pysyqtalǵanyn atap ótken jón. Kelisim asyl tuqymdy mal sharýashylyǵy jáne agroónerkásiptik keshen salasyndaǵy ulttyq zańnamanyń maqsattary men mindetterine sáıkes keledi. Kelisimniń uǵymdyq apparatynda «asyl tuqymdyq ónim», «asyl tuqymdyq qundylyq», «asyl tuqymdyq janýar», «selektsııalyq jáne asyl tuqymdyq jumys» jáne «aýyl sharýashylyǵy janýary» sııaqty termınder birizdendirilgen jáne naqtylanǵan», - dedi Aýyl sharýashylyǵy mınıstri Saparhan Omarov.

Selektsııalyq-asyl tuqymdyq jumys júrgizý kezinde múshe memleketterde asyl tuqymdyq ónim óndirý salasyndaǵy biryńǵaı talaptardy qoldaný maqsatynda Kelisimde mynalardy birizdendirý kózdeledi:

1. Asyl tuqymdy janýarlardyń tuqymyn (tuqymdyǵyn) anyqtaý tártibi (bul rette jańa tuqym shyǵarýda týystas tuqymdar tizbesi kelisiledi);

2. EAEO-ǵa múshe memleketterde aýyl sharýashylyǵy janýarlarynyń shyǵarylǵan jańa tıpterin, jelileri (tuqymdary) men krostaryn baıqaýdan ótkizý tártibi (jańa tuqym shyǵarýdaǵy jumystardy birkelki etý qamtamasyz etiledi);

3. EAEO-ǵa múshe memleketterdiń asyl tuqymdy ónimine molekýlalyq genetıkalyq saraptama júrgizý erejesi (DNK zertteýlerin júrgizý birizdendiriledi);

4. EAEO-ǵa múshe memleketterde júrgiziletin asyl tuqymdy mal sharýashylyǵy salasyndaǵy selektsııalyq-asyl tuqymdyq jumysty úılestirý jáne taldamalyq qamtamasyz etý tártibi ;

5. EAEO-ǵa múshe memleketter arasynda jáne úshinshi elderden ákelý kezinde almastyrýǵa jatatyn asyl tuqymdy janýarlar men selektsııalyq jetistikter týraly málimetter quramy.

6. Janýarlardyń asyl tuqymdyq qundylyǵyn baǵalaý ádistemeleri.

«Asyl tuqymdy mal sharýashylyǵynda, múshe memleketterde ınnovatsııalyq tehnologııalardy, onyń ishinde genomdyq selektsııany ázirleý jáne engizý maqsatynda Kelisimde asyl tuqymdy mal sharýashylyǵy salasyndaǵy selektsııalyq-asyl tuqymdyq jumysty úılestirý jáne taldamalyq qamtamasyz etý jónindegi biryńǵaı tártipti belgileý kózdeledi. Selektsııalyq-asyl tuqymdyq jumysty úılestirýdi múshe memleketterdiń ýákiletti organdary júzege asyrady, taldamalyq qamtamasyz etý ǵylymı-zertteý uıymdaryna beriledi. Sondaı-aq, Kelisimde Eýrazııalyq ekonomıkalyq odaqqa múshe memleketterdiń asyl tuqymdy mal jáne selektsııalyq jetistikter týraly málimettermen almasýy kózdeledi», - S. Omarov.

Kelisimdi ratıfıkatsııalaý: EAEO aıasynda selektsııalyq-asyl tuqymdyq jumys júrgizýdi ońtaılandyrýǵa, mal sharýashylyǵyndaǵy selektsııa men asyl tuqymdyq jumystyń damýyn qamtamasyz etýge, otandyq asyl tuqymdy ónimniń básekege qabilettiligin arttyrýǵa múmkindik beredi.