Senat «Amanat» jáne «Týǵan el» baıqaýlarynyń qorytyndysyn jarııalady
Baıqaýǵa respýblıkalyq jáne óńirlik telearnalardyń, merzimdi basylymdardyń tilshileri, blogerler men telegramm-arnalardyń avtorlary qatysqan bolatyn.
Senat Tóraǵasy Máýlen Áshimbaev qatysýshylar men jeńimpazdarǵa Palatanyń zań shyǵarý qyzmetin dáriptegeni jáne elimizdiń kún tártibindegi máselelerdi aqparattyq turǵyda ilgeriletýdegi eren eńbekteri úshin alǵys bildirdi.
«Byltyr Memleket basshysynyń bastamasymen elimizde jýrnalısterdiń kásibı merekesi – buqaralyq aqparat quraldarynyń qyzmetkerleri kúni resmı túrde bekitildi. Bul qadam túrli oqıǵalar men elimizde qolǵa alynǵan reformalar týraly halyqqa shynaıy jáne jedel habar taratatyn mamandarǵa degen qurmettiń belgisi. Qazirgi kúrdeli ýaqytta jýrnalıster dárigerlermen, quqyq qorǵaý organdarynyń qyzmetkerlerimen jáne eriktilermen birge koronavırýs indetimen kúreste aldyńǵy shepte júr. Olar qaýip-qaterge qaramastan azamattardyń dáleldi ári dáıekti aqparat alýy úshin aıanbaı jumys isteýde. Otandyq jýrnalısterdiń qyzmeti árdaıym joǵary baǵaǵa laıyq», – dedi Máýlen Áshimbaev.
Sondaı-aq, Senat Tóraǵasy «Amanat» jáne «Týǵan el» baıqaýlaryna usynylǵan eńbekterdiń kásibı deńgeıde daıyndalǵanyn atap ótti. Onyń aıtýynsha, sessııa barysyndaǵy zań shyǵarý qyzmeti, senatorlardyń saýaldary men kóptegen parlamenttik sharalar mazmundy televızııalyq sıýjetterge, jan-jaqty saraptamalyq maqalalarǵa, reporterlik zertteýler jasaýǵa arqaý bolǵan.
Baıqaýǵa kelip túsken materıaldardy saraptaý komıssııalary muqııat taldap, óz baǵalaryn berdi. Komıssııa quramyna Senat depýtattary, belgili jazýshylar men jýrnalıster engenin aıta ketken jón. Konkýrs qorytyndysy boıynsha jeńimpazdar men júldegerlerden bólek, birneshe arnaıy marapattar da taǵaıyndaldy.
«AMANAT» BAIQAÝYNYŃ LAÝREATTARY:
Gran-prı – Ońǵar Toqanov, «Qazaqstan» telearnasynyń tilshisi.
Birinshi oryn – Jadyra Jolmuhametova, «Informbıýro» aqparat agenttiginiń tilshisi.
Ekinshi oryn – Laýra Túsipbekova, «Kazahstanskaıa pravda» gazetiniń tilshisi.
Úshinshi oryn – Tatıana Kovaleva, «Zakon.kz» portalynyń tilshisi.
«TÝǴAN EL» BAIQAÝYNYŃ LAÝREATTARY:
Gran-prı – Azamat Qasymov, «Egemen Qazaqstan» gazetiniń tilshisi.
Birinshi oryn – «Eýrazııa» birinshi arnasynyń «Senat online» telejobasynyń ujymy.
Ekinshi oryn – Mırlan Altynbek, «Habar 24» agenttiginiń tilshisi.
Úshinshi oryn – Ámirbolat Hýsaıan, «Azattyq Ruhy» aqparat agenttiginiń tilshisi.
Baıqaý komıssııasynyń sheshimimen blogerlerge, tanymal jarııalanymdardyń avtorlary men erekshe aqparattyq materıaldarǵa arnaıy marapattar taǵaıyndaldy. Olardyń qatarynda:
– Ǵazız Ábishev – Abishev Analytics telegram-arnasynyń avtory;
– Ivan Sýhorýkov pen Roman Pavlov – «Tengrinews» ınternet-resýrsynyń jýrnalısi jáne beıne-ınjeneri;
– Ulpan Begalına – «Atameken business» arnasynyń tilshisi;
– Aıhan Sháripov – «AIQYN» gazetiniń tilshisi;
– Syrym Itqulov – «Hola news» shef-redaktory;
– «Ainews» jáne «Aitube.kz» ınternet jobalarynyń ujymdary bar.
Uıymdastyrýshylar baıqaýǵa belsendi qatysqany úshin barlyq qatysýshylarǵa alǵys bildiredi. Osy rette COVID-19 indetiniń taralý qaýpi seıilmeýine baılanysty jýrnalıstermen dástúrli kezdesý jáne laýreattardy marapattaý rásimin 2020 jyldyń kúzine aýystyrý týraly sheshim qabyldandy.