Semserlesýshi Aleksanın Azıadadaǵy jeńisin Denıs Tenniń rýhyna arnady

JAKARTA. QazAqparat - Qazaqstandyq semserlesýshi Dmıtrıı Aleksanın Azııa oıyndaryndaǵy jeńisin Denıs Tenge arnaıtynyn aıtty. Aqtyq synda Olımpıada chempıonynan sheberligin asyrǵan sportshy Olympic.kz saıtyna suhbat berip, óz qýanyshymen bólisken. 

«Qazirgi qýanyshymdy sózben jetkizý múmkin emes. Osy jeńiske jetý úshin bar kúshin salǵan bapkerlerime de alǵysym sheksiz. Shyny kerek,  eki koreıalyq sportshymen jolym túıisetinin bildim. Sondyqtan olarǵa qarsy daıyndala bastadym. Árıne, fınal ońaı bolǵan joq. Biraq qarsylasymnyń osal tustaryn paıdalana bildim. Sońǵy bir jyl boıy Azııa oıyndaryna daıyndalǵan edim, eńbegim zaıa ketpedi», - deıdi Aleksanın.

Ol óz jeńisin Denıs Tenniń rýhyna arnaıtynyn da jetkizdi.

«Jeńisimdi sóz joq, Qazaqstan halqyna jáne jaqynda ǵana qaıǵyly qazaǵa ushyraǵan Denıs Tenniń rýhyna arnaımyn. Bul men úshin orny tolmas qaza... Al búgingi jeńis jankúıerler men jastardyń bizdiń sportqa degen qyzyǵýshylyǵyn arttyrady dep senemin. Alǵa, Qazaqstan!», - dedi Azııa oıyndarynyń chempıony atanǵan Dmıtrıı Aleksanın.