Semeılik muǵalim fızıka zańdylyqtaryn komıks arqyly túsindirýde

<p>Semeılik muǵalim mektep oqýshylarynyń fızıka pánine degen qyzyǵýshylyǵyn oıatý úshin sabaq barysynda komıks salady, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

Abaı oblystyq Bilim basqarmasy baspasóz qyzmetiniń málimetine súıensek, «Bilim – ınnovatsııa» lıtseıiniń fızıka pániniń muǵalimi Jasqaırat Naýbetov fızıkany oqytýda erekshe ádis-tásil qoldanady. Zamanaýı muǵalim oqýshylardyń pánge degen qyzyǵýshylyǵyn arttyrý úshin áleýmettik jelilerdi, kompıýterlik oıyndar men komıksterdi kádege jaratyp júr.

Oqýshylardyń oılaý qabiletin damytý maqsatynda ol fızıkany komıks arqyly oqytýda. Nátıjesinde, qyzyq sýret salý úshin balalar taqyrypty jiti zerttep, shyǵarmashylyq turǵyda damı túsedi.

Muǵalim 7-9 synyp oqýshylaryna osyndaı erekshe ádisti qoldanýda. Olar «Nıýton zańdary», «Energııanyń saqtalý zańy», «Arhımed zańy» syndy taqyryptarda komıks jasap, túsiný qıyn taqyryptardy jeńildetedi.

Foto: Abaı oblysy bilim basqarmasynyń baspasóz qyzmeti

 

- Komıksterdi alǵash paıdalanǵan kezimde oqýshylardyń fızıkaǵa degen qyzyǵýshylyǵy artyp, sabaqty bar yntasymen oqı bastady. Qazirgi balalar kóp ýaqytyn smartfonmen ótkizedi. Bul ádis telefonda ýaqytty tıimdi jáne paıdaly ótkizýdiń utymdy tásili. Ásirese balanyń oılaý jáne shyǵarmashylyq qabiletterin damytyp, sýret salýǵa baýlıdy. Qazir oqýshylar komıksterdi ózderi jasap, ony jańa taqyrypty túsiný úshin paıdalanýda», - deıdi Jasqaırat.