Semeılikter Elbasynyń jalaqyny kóterý týraly bastamasyn qyzý qoldady

SEMEI. QazAqparat - Qazaqstan Prezıdenti N.Á.Nazarbaev jyldaǵy dástúr boıynsha Qazaqstan halqyna arnaǵan Joldaýyn jarııa etti. Semeı qalasyndaǵy Dostyq úıinde tikeleı kórsetilim uıymdasty­rylyp, oǵan Qazaqstan halqy Assambleıasynyń jáne qalanyń etnomádenı birlestikteriniń jetekshileri men jastar, turǵyndar qatysty, dep habarlaıdy QazAqparat. 

Bıylǵy Joldaý elimizdiń áleýmettik-ekonomıkalyq damýynyń ózekti máselelerine jáne turǵyndardyń ál-aýqatyn arttyrýǵa baǵyttalyp otyr. Jınalǵandar basty qujattyń áleýmettik jáne ekonomıkalyq baǵyttaryn joǵary baǵalap,  Elbasynyń eldi alǵa jeteleıtin jańa mindetterin oryndaýǵa daıyn ekendikterin jetkizdi. Jınalǵandardy Nursultan Nazarbaevtyń eń tómengi jalaqy mólsherin bir jarym esege, ıaǵnı 28 284 teńgeden 42 426 teńgege deıin kóterý týraly bastamasy qýantty.

«Elbasy Joldaýynan halyqtyń kúteri kóp. Sondyqtan jyl saıynǵy dástúrli joldaýdy asyǵa kútedi. Elbasy bıyl da birqatar jumystar júrgizilip, mańyzdy ister atqarylatynyn aıtty. Sóziniń basynda 2019 jyldyń qańtarynan bastap eń tómengi jalaqy mólsherin 1,5 esege arttyrýdy tapsyrdy. Sebebi, baǵa ósip jatyr. Sondyqtan  halyqtyń eńbekaqysyn kóterý - búgingi zaman talaby. Mysaly, Dostyq úıi sııaqty mekemelerdegi jumysshylardyń eńbekaqysy joǵary dep aıta almaımyn. Sondyqtan, bul bastama kóptegen qyzmetkerlerdiń eńbek ónimdiliginiń artýyna yqpal etedi»,-deıdi Semeı qalalyq Dostyq úıiniń dırektory Berik Kópbaev.  
 

Sonymen qatar, qala turǵyndary da Elbasy joldaýyna qoldaý bildirdi. Turǵyndar, ásirese, qala ishindegi bos jatqan jerlerdi qaıtarý jónindegi tapsyrmany qyzý qoldap otyr.

«Elbasy Joldaýy kóńilimnen shyqty. Paıdalanylmaǵan jerlerdi memleketke qaıtarý máselesin kótergeni durys boldy. Prokýratýra taıaýda bul isti qolǵa alady dep senem. Sebebi, qalada satyp alynyp, biraq qazir bekerge bos jatqan  jerler bar. Óz kezeginde olar qala kórkine  de syn. Eger sol oryndarda halyqqa paıdaly  nysandar boı kóterse nemese úı salýǵa berilse, halyqqa paıdaly bolar edi»,-deıdi qala turǵyny Ǵalymbek Qadenuly.