Semeılik júrgizýshi Qytaıdyń túrmesinde jatyr - BAQ

ASTANA. QazAqparat - Júk kóliginiń júrgizýshisi bolyp jumys isteıtin Semeı qalasynyń turǵyny Evgenıı Mıronovqa Qytaıdyń shekarasynda kisen salyndy. Onyń kóliginen pnevmatıkalyq qarýdyń eki qorap oǵy shyqqan, dep habarlaıdy altaynews.kz . 

Júk tasıtyn júrgizýshi qazir Qytaıda elde qamaýda jatyr. Qytaı shekarashylary kólikti tekserý barysynda, usaq-túıek zattar salatyn qaltadan ishinde 715 oǵy bar eki qorapty taýyp aldy. Kórshi eldiń arnaıy qyzmet ókilderi jerlesimizdi tutqyndaǵaly bir aıdan astam ýaqyt ótipti. Sotty kútip, Sháýeshek qalasyndaǵy ýaqytsha tergeý ızolıatorynda jatqan 42 jastaǵy qazaqstandyq júrgizýshi 10 jylǵa bas bostandyǵynan aıyrylýy múmkin.

Jubaıynyń aıtýynsha, qazir Evgenıı Mıronovpen eshqandaı baılanys joq.

«Konsýl kezdesip, sóılesken eken, densaýlyǵy jaqsy, bári durys degennen basqa eshteńe aıtqan joq. Kúıeýim oqty baqshadaǵy qarǵalardy úrkitý úshin Qazaqstanda satyp alǵan. Bizde ony satyp alýǵa eshqandaı ruqsattyń keregi joq. Ol kóbinese Reseıden júk tasıtyn,oılamaǵan jerden Qytaıǵa baratyn bolyp qaldy da, kóliktiń ishinde jatqan oqty umytyp ketken», - deıdi júrgizýshiniń jubaıy Elena Mıronova.

Shekaradan oq-dárilerdi alyp ótti dep aıyptalǵan Evgenıı Mıronovtyń soty tamyzdyń ishine belgilengen eken. Mıronovtar otbasy birden elimizdiń syrtqy ister mınıstrligine habarlasypty. Ázirge, atalǵan istiń anyq-qanyǵy zerttelip jatyr.