Semeılik oqýshylar aýadan tuşy sý alýdyń jolyn oılap tapty
Qaladaǵy fızıka-matematıka baǵytyndaǵy Nazarbaev zııatkerlik mektebiniń 10-synyp oqýshylary Pákjan Nııazbek pen Erasyl Myrhıev respýblıkalyq «Jerge qamqorlyq - adamǵa qamqorlyq» arnaıy konkýrsynyń fınalyna ótti.
Birneshe kezeńnen turǵan saıysqa 60-tan astam komanda qatysyp, ózderiniń jobalaryn usynǵan.
Saıys aýyldy jerlerdegi halyqtyń ál-aýqatyn kóterip, aýyldan qalaǵa jappaı kóshýdiń aldyn alýǵa baǵyttalǵan.
«Biz aýyl turǵyndaryn taza aýyzsýmen qamtamasyz etý máselesi boıynsha jobany qolǵa aldyq. Sońǵy bir jyl boıy joba boıynsha zertteý jumystaryn júrgizip, elimiz úshin ǵana emes álem boıynsha ózekti sanalatyn kúrdeli máseleniń sheshimin tabýǵa tyrystyq. Bir atap óterligi – aqtyq synǵa joldama alǵan 8 úmitker komandalardyń arasynda biz ǵana mektep oqýshysymyz. Qalǵandary - joǵary oqý oryndarynyń stýdentteri», - deıdi jas zertteýshiler.
Pákjan men Erasyldyń jobalarynyń ózektiligi – aýadan tuşy sý alýynda.
«Water from air» qurylǵysy aýadan sýdy kondensatsııa ádisi arqyly alady.
«Jańbyrdan, tumannan paıda bolǵan atmosferalyq sý býy tordyń sýyq betinde kondensatsııalanyp, qurylǵynyń tómengi jaǵynda ornalasqan rezervýarǵa jınalady. Ónimdilik aýa-raıyna tikeleı baılanysty. Biraq esepteýimiz boıynsha kúnine 100 lıtrge deıin sý alýǵa múmkindik bar», - deıdi oqýshylar.
Zertteý negizinen elimizdiń halyq tyǵyz qonystanǵan ońtústik óńirindegi 5 aýyl boıynsha júrgizilgen.
Bul aýyldarda sý tapshylyǵy sezilip, turǵyndar sýdy tasyp ishedi.
Fınalda jeńiske jetken jaǵdaıda jas zertteýshiler aýylǵa sý jınaıtyn munara ornatyp, jobany ary qaraı damytýdy maqsat etip otyr.
Aıta keteıik, saıystyń aqtyq syny 12 mamyrda «ENACTUS Kazakhstan National EXPO 2022» aıasynda ótkizilmek.