Semeılik oqýshy halyqaralyq olımpıadada altyn enshiledi

SEMEI. QazAqparat – Semeı qalasyndaǵy mektep oqýshysy halyqaralyq olımpıadada ınformatıka páninen jeńiske jetti, dep habarlaıdy QazAqparat tilshisi.

Semeıdegi Nazarbaev zııatkerlik mektebiniń 11 synyp oqýshysy Sahmoldın Muhammadarıf halyqaralyq olımpıadanyń altyn medalin oljalady. Atalǵan olımpıada matematıka, fızıka jáne ınformatıka pánderi boıynsha daryndy balalardy anyqtaý men olarǵa qoldaý bildirý maqsatynda 2005 jyldan beri ótkizilip keledi.

«15-23 aqpan aralyǵynda uıymdastyrylǵan HVIII halyqaralyq Jáýtikov olımpıadasy onlaın formatta ótti. Onda elimizden bólek, Qyrǵyzstan, Ózbekstan, Tájikstan, Túrkimenstan, Reseı, Belarýs, Ýkraına, Grýzııa, Armenııa, Túrkııa, Mońǵolııa, Vetnam, Rýmynııa, Bolgarııa, Serbııa, Úndistan syndy memleketterdiń kil myqtylary baq synasty. Bilim báıgesinde báseke óte joǵary boldy», - delingen bilim ordasynyń baspasóz qyzmeti taratqan aqparatta.

Sahmoldın Muhammadarıf baq synaǵan ınformatıka pánine 300-den asa shákirt qatysqan.Ol eń joǵary nátıje kórsetip, jeńimpaz atandy.