Semeılik memlekettik qyzmetshiler túrmede bolyp qaıtty

SEMEI. QazAqparat – Semeı qalasy ákimdiginiń bólim basshylary túzeý mekemesinde bolyp qaıtty, dep habarlaıdy QazAqparat.

Sybaılas jemqorlyqqa qarsy is-qımyl agenttigi uıymdastyrǵan ekskýrsııanyń maqsaty – memlekettik qyzmetshilerge sybaılas jemqorlyqqa barǵandardyń qalaı jazalanatynyn kórsetý.

«Túrmege qamalǵandaryń ómirimen tanystyrý arqyly olardy bostandyǵy men otbasyn qadirleýge shaqyrǵymyz keldi. Nátıjesinde memlekettik qyzmetshiler bolashaqta sybaılas jemqorlyq jasaýdan aýlaq bolady», - deıdi QR Sybaılas jemqorlyqqa qarsy is-qımyl agenttiginiń Shyǵys Qazaqstan oblysy boıynsha departamentiniń basshysy Renat Nábıev.

Ekskýrsııa aıasynda memlekettik qyzmetshiler túzeý mekemesiniń tynys-tirshiligimen tanysyp, ashana, sport zaly, kitaphana jáne basqa da bólmelerdi aralap kórdi. Sondaı-aq bir kezderi súrinip, qazir temir tordyń ar jaǵynda kún keship jatqandarmen áńgimelesýge múmkindik týdy.

«Jas memlekettik qyzmetshilerge sybaılas jemqorlyqqa jol bermeý úshin etıka men zańdy qatań saqtaý kerektigin aıtqym keledi. Tek jumysqa mán berý kerek. Kezinde men teris qadam jasadym. Advokat bolyp jumys istep júrip, bireýdi bopsalaǵanym úshin 8 jylǵa sottaldym. Qamaýda otyrǵanyma 3 jyl boldy. Qylmys jasaǵanym úshin áli kúnge deıin ókinemin. Sondyqtan memlekettik qyzmetshilerge zańnan attamaý kerektigin aıtym keledi», - deıdi túrmedegilerdiń biri.

Sybaılas jemqorlyqtyń aldyn alý jáne jolyn kesý maqsatynda osyndaı sharalar aldaǵy ýaqytta jalǵasyn tappaq.