Semeılik kópbalaly otbasy baspanadan bas tartyp, aýylǵa kóship bardy
Semeı qalasynyń aqparattyq ortalyǵynan málim etkendeı, Júnisovtar otbasynda alty bala bar. Úlken uly 14 jasta, al kishi qyzy – 1 jastan asqan. Aldaǵy jyly januıa taǵy tolyǵa túspek.
Biraq, osy jaǵdaıyna qaramastan, Maral Júnisova qol qýsyryp otyrar jaıy joq. Bir aı buryn otbasy Semeı mańynda ornalasqan Shaqaman aýylyna kóship bardy. Óz atyn atamaýǵa tilek bildirgen kásipker januıaǵa qora-qopsysy, aýlasy bar úı satyp alyp bergen. Kópbalaly ana «Bıznes bastaý» memlekettik baǵdarlamasy boıynsha grant utyp, 20 taýyq pen muzdatqysh satyp alǵan. Aldaǵy ýaqytta sıyrlardy da satyp alý josparynda bar.
Osylaısha, kópbalaly otbasy turǵyn úı kezeginen shyǵyp, aýylǵa kóshken.
«Qalada jaldamaly páterde turdyq. Sýyq mezgilde jıi kóshkendikten, balalar únemi aýyryp qalatyn. Joldasym tabys tabady. Biraq qarajat jetispeıdi. Sondyqtan óz kásibimdi bastaýǵa bel býdym. Kóktemde aýlaǵa kartop pen kókónis otyrǵyzatyn bolamyz. Men otbasymdy sútpen jáne jumyrtqamen qamtamasyz ete alamyn. Qurt pen maı jasap, satýǵa shyǵara alamyn. Biz memleketten únemi kómek suraı almaımyz. Páter kezeginde shamamen segiz jyl boıy turdyq. Biraq, úıden shyqpaı-aq aqsha tabýǵa múmkindik bar ekenine kózim jetti. Ár kópbalaly ana úıde otyryp ta tabys kózin jasaı alady. Eger tyryssańyz, aýylda da bárin jasaýǵa bolady», - deıdi Maral.
Jaqynda ǵana qonys aýdarǵan Maral aýylǵa tanymal bola bastady. Ol basqa da kópbalaly analarmen birigip, muqtaj otbasylarǵa azyq-túlik, kıim-keshekpen kómektesip júr.