Semeılik kásipkerler Rıdderge 16 mln teńge aýdaryp, gýmanıtarlyq júk jiberdi

SEMEI. QazAqparat – Semeı qalasynyń turǵyndary men kásipkerleri Rıdderdegi órtten baspanasyz qalǵandarǵa kómek kórsetý úshin arnaıy shotqa 16 mln teńgeden astam qarajat aýdaryp, gýmanıtarlyq kómek jınady, dep habarlaıdy QazAqparat tilshisi.

«Osyndaı qıyndyqtardy tek birigip qana jeńe alamyz. Úıinen aıyrylǵan jerlesterimizge kómek kórsetýimiz kerek. Barsha turǵyndar men kásipkerlerdi órt saldarynan zardap shekken otbasylarǵa qolushyn sozýǵa shaqyramyn», - dedi «Fırma Azııa» JShS dırektory Sáýle Dosqojanova.

Sondaı-aq shahar kásipkerleri 15 tonnaǵa jýyq azyq-túlik jınaǵan. «Agrofırma – Prırechnyı» JShS 5 tonna pııaz jáne 5 tonna qyryqqabat bóldi. «Aı-Ar» JShS 350 keli 1 surypty un, «AQ-nan KZ» JShS 250 keli un, «Semnan» JShS óz óndirisiniń unnan jasalǵan kondıterlik ónimderin, atap aıtqanda 10 qorap pechene, 10 qorap qytyrlaq nan jáne tátti toqashtar jiberdi. «Semei Qus» JShS 2 sanattaǵy 10 qorap jumyrtqa jibergen.

Budan bólek, «Aprel» kópfýnktsıonaldy kesheni 50 keli kúrish, 100 keli makaron ónimderin, 50 keli qaraqumyq jarmasyn, 50 lıtr kúnbaǵys maıyn jáne 50 keli un men qant bóldi.

Búgin barlyq kómek qory jınalǵan eki júk kóligi Rıdder qalasyna jol tartady.

Esterińizge sala ketsek, 10 mamyrda Shyǵys Qazaqstandaǵy Rıdder orman sharýashylyǵynda alapat órt shyqqan. Órtten 1 adam qaza taýyp, ekeýi jaraqat alǵan. Memleket basshysy Úkimet pen Shyǵys Qazaqstan oblysynyń ákimdigi tilsiz jaýdan zardap shekken Leshoz kentiniń turǵyndaryna kómek kórsetip, baspanamen qamtamasyz etýdi tapsyrdy. Búgin saǵat 18.20 órt aýyzdyqtaldy.