Semeılik áıel toqtap qalǵan lıft ishinde bosandy

Semeı qalasynda júkti áıel toqtap qalǵan lıft ishinde bosandy, dep habarlaıdy QazAqparat tilshisi.

Oqıǵa 3 qyrkúıek kúni oblystyq perınataldyq ortalyqtyń №1 ǵımaratynda bolǵan. Biraq aqparat áleýmettik jelide tek búgin jarııalandy. QazAqparat tilshisi atalmysh ortalyqtyń bas dárigerine habarlasyp kórdi.

«Júkti áıelderdi akýsherdiń súıemeldeýimen júkti áıelder patologııasy bólimshesinen perzenthanaǵa aýystyrý kezinde osyndaı jaǵdaı boldy. 2-den 4-shi qabatqa kóterilip kele jatqan lıft kenet toqtap qalǵan. Shuǵyl túrde qyzmet kórsetetin uıymnan lıftshi shaqyryldy, ol kelip, birden lıftti jóndeýge kiristi», - deıdi Arhat Qudaıberdiuly.

Lıft ishinde tolǵaǵy kelgen júkti áıel jáne perınataldyq ortalyqtyń tájirıbeli akýsherkasy bolǵan. Akýsherkaǵa áıeldi lıftte bosandyryp alýǵa týra keldi. Salmaǵy 3460 gramm ul bala asqynýsyz dúnıege kelgen.

Áıel adam ekinshi kúni nárestesimen qanaǵattanarlyq jaǵdaıda úıine shyǵaryldy. Onyń perınataldyq ortalyqqa eshqandaı shaǵymy joq.

Lıfttiń aıaq asty toqtap qalýy alǵash ret emes. Bıyl ortalyqqa Parlament Májilisiniń depýtaty kelgen kezde de lıft istemeı qalypty.

«№1 ǵımarattyń lıfti 1988 jyly paıdalanýǵa berilip, jyl saıyn tekserilip turady. Osyndaǵy 2 lıftti aýystyrý maqsatynda jobalyq-smetalyq qujattama ázirlengen. Jobaǵa qarjy bekitilip, bıylǵy jyldyń 20 qazanynda tıisti jumystar bastalýy tıis», - deıdi bas dáriger.