Semeıdiń ortalyq saıabaǵy jóndeledi

SEMEI. QazAqparat - Semeıdiń ortalyq saıabaǵyna aýqymdy jóndeý jumystary júrgiziledi. Qala ákimi Ermak Sálimov búgin saıabaqta​ bolyp, jobalaýshylarmen jáne BAQ ókilderimen kezdesti. Bul týraly QazAqparat Semeı aqparattyq ortalyǵyna silteme jasap habarlaıdy.

Qala basshysy jasyl buryshtyń aýqymdy rekonstrýktsııalaýǵa ushyraıtynyn aıtty. Ortalyq saıabaq qala turǵyndary úshin zamanaýı jáne jaıly demalys aımaǵyna aınalmaq.

«Biz aǵashtarǵa tımeımiz. Patologııalyq saraptama arqyly kesý jumystary ǵana júrgiziledi»,-dedi Ermak Səlimov.

Ermak Səlimov Shákárim eskertkishi men azamat soǵysynyń batyry memorıaly burynǵy ornynda qalatynyn aıtty. Jəne saıabaqtyń ishindegi barlyq kóńil kóterý oryndaryn qorshaýdy tapsyrdy.

Jobalaýshylar saıabaq 4 aımaqqa bólinetinin aıtty. Demalys ornynda​ amfıteatr, balalar jáne sport alańdary​ paıda bolady. Saıabaq aımaǵynda zamanaýı sýburqaqtar ornatylyp,​ barlyq aýmaq jaryqdıodty shamdarmen qamtamasyz etiledi. Balalar úshin tabıǵı materıaldardan daıyndalatyn alań qarastyrylǵan. Al zeınetke shyqqan turǵyndar úshin shahmat taqtalary men bı alańy ornatylady.

«Saıabaqta fýtbol, basketbol, voleıbol jáne skeıt alańdary paıda bolady», - dedi jobalaý kompanııasy basshysynyń orynbasary Marat Jumaǵulov.

Jumys taıaý kúnderi bastalady. Joba boıynsha demalys aımaǵyn qalpyna keltirý úsh aıǵa sozylmaq .