Semeıdi damytý jospary: áleýmettik nysandar qurylysy - basty nazarda
Qalalyq Aqparat ortalyǵynyń málimetinshe, josparda Semeıdi damytý maqsatynda turǵyn úı qurylysy, sýmen jabdyqtaý, jol jóndeý, energetıka, bilim jáne densaýlyq saqtaý salalary boıynsha 56 joba qarastyrylǵan.
Jalpy shahardy damytýdyń keshendi josparyn júzege asyrýǵa 260 mlrd teńge bólinbek. Alaıda oblys ákimi Danıal Ahmetovtiń tapsyrmasymen josparǵa ózgerister engizilip, qosymsha bólingen qarajat birinshi kezekte áleýmettik nysandarǵa jumyldyrylady.
«Ókinishke qaraı, jeke ınvestorlar bastamashy bolǵan keıbir nysandarda jumystar aıaqsyz qaldy. Osyǵan baılanysty komıssııa jáne 10 basqarma basshysy qalaǵa kelip otyr. Olar tekserý júrgizip, tıisti is-shara josparyn pysyqtaıdy. Eki kún jumys istep, nátıjesi dúısenbi kúni oblys ákimine baıandalady. Jalpy, josparda qarastyrylǵan 56 sharanyń búgingi tańda 10-y aıaqtaldy. Qalǵandary boıynsha jumystar júrgizilýde», - dedi ShQO ákiminiń orynbasary Nurjan Jumadilov.