Semeıdegi jylý-elektr ortalyǵynyń jumysshylary jalaqy ala almaı otyr

SEMEI. QazAqparat – Jýyrda buqaralyq aqparat quraldary men áleýmettik jelilerde Semeıdegi jylý-elektr ortalyǵynyń jumysshylaryna jalaqy tólenbeı otyrǵandyǵy týraly aqparat tarady. QazAqparat tilshisi munyń aq-qarasyn anyqtap kórdi.

Jelide taraǵan aqparatta jylý-elektr ortalyǵynyń eńbek ujymy osy jyldyń tamyz aıynan beri jalaqydan qaǵylǵany, olarǵa aılyqtyń ornyna sút pen basqa da ónimderge talon alý usynylǵany týraly aıtylǵan. Ortalyq dırektory Azat Sarpekov jalaqy máselesiniń bar ekendigin rastap otyr. Alaıda ol eńbekaqy tamyzdan emes, qyrkúıek aıynan bastap berilmegenin jetkizdi.

«Sút talony qyzmetkerlerge jalaqydan bólek kúndelikti beriledi. Bul ortalyq jumysynyń densaýlyqqa zııan keltirýine baılanysty ótemaqy. Negizinen aılyq máselesi bizde jyl saıyn týyndaıdy. Sebebi jazdyń kúni jylý bolmaǵandyqtan ortalyqqa aqsha túspeıdi. Buǵan jumysshylar úırengen. Biraq kúz kezinde barlyǵyna tıisti aqshalary tólenýde. Bıyl da solaı bolady. 10 kún ishinde jalaqy boıynsha qaryz tolyqtaı óteledi», - dedi A.Sarpekov.

Onyń aıtýynsha, bıyl jylý-elektr ortalyǵy jumysshylarynyń jalaqysy 40 paıyzǵa artqan. Jalpy búginde sol jerde 1800-ge jýyq adam jumys isteıdi.

ShQO memlekettik eńbek ınspektsııasy basqarmasynyń basshysy Baqytbek Qızatov ortalyq qyzmetkerleri tarapynan eshqandaı shaǵym túspegenin málim etti.

«Biz bul máseleden habardarmyz. Inspektsııa mamandary atalǵan mekeme basshylyǵyna habarlasqan. Olar jalaqy máselesiniń jýyq arada sheshiletindigin túsindirdi. Eger aılyq tólenbese eńbek ujymy aryzdanýǵa haqyly. Sondaı jaǵdaıda jylý-elektr ortalyǵyna QR ÁQBtK-niń 87-babyna sáıkes aıyppul salynady», - dedi ol.