Semeıdegi orman órti negizinen túnde sóndirilýde – jedel shtab

ASTANA.QazAqparat – Semeıdegi orman órtin aýyzdyqtaýǵa qatty jel kedergi keltirip tur. Tilsiz jaýmen kúres jumystary negizinen túngi ýaqytta júrip jatyr. Bul týraly óńirde qurylǵan jedel shtabtyń jetekshisi Dmıtrıı Garıkov málim etti, dep habarlaıdy QazAqparat tilshisi

«Jeldiń kóterilýinen jaǵdaı qıyndap barady. Qazir órt Tavrııa aýylyndaǵy Kashtak ormanshylyǵyna qaraı bet aldy. Tehnıkanyń 65%-y sonda jumyldyryldy. Al Ýspen ormanshylyǵynda shaǵyn órt oshaqtary shyǵyp jatyr. Órtpen kúres negizinen túnde júrgizilip jatyr. Sonymen qatar Jernovka aýylynda ahýal órship tur, sebebi tehnıkany aýyl aýmaǵyna kirgizýde kedergi bar», - dedi Dmıtrıı Garıkov.

Onyń aıtýynsha, órt sóndirýshilerdiń qazirgi mindeti – jalyndy eldimekender aýmaǵyna jibermeý.

«Turǵyndar ázirge úılerinde, olar habardar. Tavrııa eldimekeni qaýipti aımaq retinde qalyp otyr, óıtkeni jel sonda baǵyt alýda. Qazir oblys jáne qala ákimi Kashtak ormanshylyǵynda», - deıdi ol.

Sonymen qatar jedel shtab basshysy tilsiz jaýdyń saldarynan Bestapaev jáne Ýspen ormanshylyǵynyń iri kólemde zardap kelgenin aıtty.

«Mundaı iri kólemde órt kórgen emespin, alǵashqy 22-nen keıin órtten keıin biz ózimizdi senimdirek ustaýdamyz. Aıtpaqshy, azyq-túlik jetpeı jatyr degen jalǵan aqparat. Turǵyndarǵa, volonterler men janashyr jandarǵa alǵys aıtamyz. Jumys jalǵasyp jatyr», - deıdi D. Garıkov.