Semeıdegi orman órti: ákimdik qandaı kómek kórsetýde

SEMEI. QazAqparat - Abaı oblysy ákimdigi tek aldyńǵy qatarda ǵana emes, volonterlermen birge órt aımaǵynda jan-jaqty kómek kórsetýde, dep habarlaıdy QazAqparat.

Ákimdik kúshimen birneshe aýdanda dalalyq as úıler uıymdastyryldy. Dalalyq asúıler toqtaýsyz jumys istep, órt sóndirýshilerdi ýaqytynda ystyq tamaqpen qamtamasyz etýde.

Sonymen qatar, Semeı jáne Borodýlıha aýdandarynda uıymdastyrylǵan evakopýnktterge Borodýlıha aýdanynyń Ýspenka, Prınebesnoe, Baryshevka kentteriniń, sondaı-aq Kashtak, Talıtsa, Tepkashı, Polovınkı aýyldarynyń turǵyndary kelip qonystandy. Onda evakýatsııalanǵandardyń barlyǵyna ystyq shaı berilip, tamaqtandyrylyp, barlyq qajetti zattarmen qamtamasyz etildi. Evakýatsııalanǵan azamattardyń jalpy sany - 70-ten asady.

Eń kishkentaı evakýatsııalanǵan balalar úshin oblystyń bilim basqarmasynyń kúshimen qala boıynsha ekskýrsııa jasalyp, demalys uıymdastyryldy.

Jalpy Semeıdegi evakopýnktter 800-den astam adamdy qabyldaı alady. Turǵyndar tastap ketken úılerdiń janynda polıtsııa qyzmetkerleri tonaý faktilerin boldyrmaý úshin kezekshilik etýde. 43 tártip saqshylary kúndiz-túni qaraýsyz qalǵan kentterde qaýipsizdikti qamtamasyz etedi.

JAO jáne eriktilerdiń kúshterimen órttiń aldyńǵy shetine 1 tonnadan astam aýyz sý, 250 kg qoı eti, qus eti, nan, nan-toqash ónimderi, túrli kókónister jetkizildi. Sondaı-aq, 10 tonna túrli ónim jetkizildi, onyń ishinde 3,5 tonna un, 500 kg qant, kúnbaǵys maıy, konserviler bar.

Órtten keltirilgen zalal komıssııalyq tekserý nátıjeleri boıynsha óteletin bolady.