Semeıdegi HQO-larda sot oryndaýshylary jumys isteı bastady

ÓSKEMEN. QazAqparat - Semeı prokýratýrasynyń bastamasymen qalanyń barlyq HQO-larda sot oryndaýshylary jumys isteı bastaıdy. Endi turǵyndar ortalyqqa júginip, olarda tólenbegen aıyppul ne alıment boıynsha qaryzdyń bar-joǵyn teksere alady, dep habarlady «QazAqparat» HAA tilshisi Semeı qalasynyń prokýratýrasyna silteme jasap.  

Bul jańalyqty qadaǵalaý vedomstvosy  «100 naqty qadam» ult jospary jáne «Aıyppul tóle», «Alıment tólemeýge qarsy 30 qadam», «Alıment tóle» jobalaryn iske asyrý aıasynda iske qosty. Halyqqa qyzmetti aıyppul men alımentti óndirip alý boıynsha mekeme qyzmetkerleri usynady. Bul shara halyqty tıisti habardar etý  jáne qaryzdy ýaqtyly óteý úshin qabyldandy

Qalalyqtar sondaı-aq QR Ádilet mınıstrliginiń saıtynan da olarda tólenbegen aıyppul nemese qaryzdyń bar-joǵy jaıly bile alady.