Semeıdegi et kombınatynyń jeri sheteldikterge satylatyny ras pa – ákim jaýaby

SEMEI. QazAqparat – Abaı oblysynyń ákimi Nurlan Uranhaev Ortalyq kommýnıkatsııalar qyzmetiniń kóshpeli brıfıngisinde Semeıde Keńes zamanynda shujyq ónimderimen tanymal bolǵan et kombınaty qytaılyq kásipkerlerge satylatyny týraly aqparatqa jaýap berdi, dep habarlaıdy QazAqparat tilshisi.

«Siz brıfıng kezinde oblystaǵy tarıhı oryndar týraly aıtyp óttińiz. Men zooveterınarlyq ınstıtýt pen et kombınaty, jún-teri fabrıkasy sııaqty iri kásiporyndar týraly suraıyn dep edim. Olar qytaılyq bıznesmenderge satylady degen áńgime aıtylyp júr. Feık pe, feık emes pe, sony aıta ketseńiz», - dep surady BAQ ókili.

Nurlan Uranhaevtyń aıtýynsha, zooveterınarııa ınstıtýty ǵımaratyn qalpyna keltirý múmkin emes.

«Zooveterınarlyq ınstıtýt týraly aıtsaq, birneshe ret zertteý júrgizdik. Keıingi joly jeke ózim QazQSǴZI mamandaryn tartqanmyn. Olar bizge naqty qorytyndy berdi. Ol qorytyndy boıynsha ǵımaratty saqtap qalý múmkin emes, ókinishke qaraı. Ǵımarat ıesimen sóılesip, qabyrǵalarynyń birin estelik úshin qaldyrýdy suradyq. Basqa múmkindigi joq. Jaýyn men jeldiń ótinde óte kóp turyp qalǵan», - dedi ol.

Ákimniń sózinshe, et kombınatynyń ornyn sheteldikterge satý múmkin emes.

«Buryn Semeıde turǵan bolsańyz biletin shyǵarsyz. Ol kombınattyń ornynda satýǵa jaramdy eshteń joq dep oılaımyn. Al ol aýmaqtaǵy jer teliminiń ıesi bar. Bizdiń zańdy biletin bolsańyz, jerdi sheteldikterge satý múmkin emes», - dedi aımaq basshysy.