Semeıdegi eskertkishter tizilimine taǵy bir tarıhı ǵımarat qosyldy

SEMEI. QazAqparat - Semeı qalasyndaǵy Naımanbaev kóshesi, 187 mekenjaıyndaǵy kópes úıi birneshe ret buzylýdan aman qaldy. Jaqynda ǵımarat tarıh jáne sáýlet eskertkishteriniń tizilimine engizilip, memleket teńgerimine alynǵan, dep habarlaıdy QazAqparat.

Bul týraly Abaı óńirlik kommýnıkatsııalar qyzmetinde ótken baspasóz máslıhatynda oblystyq mádenıet, tilderdi damytý jáne arhıv isi basqarmasynyń basshysy Aıdar Ibraev málim etti.

«Qazir ǵımarat bizdiń qorǵaýymyzda. Ǵımarattyń ıesi bar, biraq Semeıde turmaıdy. Biz onymen turaqty baılanystamyz. Úı ıesi ǵımarttyń kelbetin saqtaı otyryp, qaıta qalpyna keltiredi. Nysannyń buzylýyna jol bermeımiz», - dedi Aıdar Ibraev.

Basqarma basshysy burynǵy «Bınar» qonaqúıi jaıly da aıtyp ótti.

«Munda nysandy qalpyna keltirý jumystary júrip jatyr. Bizge aldyn ala úlgisin kórsetti jáne komıssııaǵa usyndy. Bastapqy kelbeti buzylatyn bolǵandyqtan, ǵımaratty kirpishpen qaptaýǵa kelispedik. Iesi bizdiń usynysymyzdy quptady,- dedi Aıdar Ibraev.

Naımanbaev kóshesi, 116 mekenjaıyndaǵy burynǵy telegraf keńsesiniń ǵımaratynda da jóndeý jumystary júrgizilýde.

«Ǵımarat apatty jaǵdaıda turǵandyqtan, tarıh jáne sáýlet eskertkishteri qatarynan shyǵarylǵan. Qazir nysannyń ishki qalpyna keltirý jumystary bastaldy, ıesimen tyǵyz baılanystamyz. Aldaǵy ýaqytta ǵımaratty óz teńgerimimizge alamyz», - dep túıindedi sózin Aıdar Ibraev.