Semeıdegi bilim ortalyǵynda 11,5 keli marıhýana tabyldy

SEMEI. QazAqparat – Semeı qalasynda bilim ortalyǵyndaǵy oqý kabınetinen 11 keliden astam marıhýana tabyldy, dep habarlaıdy QazAqparat tilshisi.

Semeı qalalyq Polıtsııa basqarmasy baspasóz qyzmetiniń málimetine súıensek, tártip saqshylary bilim ortalyqtarynyń birindegi aǵylshyn tili páni kabınetinen esirtki tapqan. Kóp uzamaı esirtki tasymaldady degen kúdikpen Almaty qalasynyń 36 jastaǵy turǵyny ustaldy.

«Tintý barysynda ústeldiń astyndaǵy qoraptan ósimdik tektes zat tabyldy. Saraptama nátıjesimen anyqtalǵandaı, bul keptirilgen marıhýana bolyp shyqty. Onyń jalpy salmaǵy 11 500 grammnan asady», - delingen aqparatta.

Qazirgi ýaqytta atalǵan fakti boıynsha QR Qylmystyq kodeksiniń 297-baby 3-bóligine sáıkes sotqa deıingi tergeý amaldary bastaldy. Kúdikti 10-nan 15 jylǵa deıingi merzimge bas bostandyǵynan aıyrylýy múmkin.