Semeıdegi tanymal aspaly kópirge jóndeý júrgiziledi

<p>Abaı oblysynda Ertis ózeni arqyly jańa tórt jolaqty kópir salynyp jatyr. Sondaı-aq, Semeıdegi aspaly kópirge jóndeý júrgiziledi. Bul týraly Abaı oblysynyń ákimi Nurlan Uranhaev elordadaǵy esep berý brıfınginde aıtty, dep habarlaıdy <a href="https://kaz.inform.kz/" target="_blank" rel="noopener">Kazinform</a>.</p>

«Kólik ınfraqurylymy salasynda Ertis ózeni arqyly jańa tórt jolaqty kópir qurylysy júrýde. Aspaly kópirdi japon mamandary tekserdi. Qazir jobalyq-smetalyq qujatamalary ázirlenýde», - dedi Nurlan Uranhaev Astanadaǵy Ortalyq kommýnıkatsııalar qyzmetinde ótken brıfıngte.

Oblys ákimdiginiń habarlaýynsha, kópirdiń negizgi qurylymyn jóndeý ǵana emes, jol tósemin jańartý da josparlanýda.

Odan bólek, 2023 jyly jergilikti mańyzy bar 235 shaqyrym jol ortasha jóndeýden ótti.

Atalǵan jumystarǵa 9,9 mlrd teńge qarastyrylǵan.

Onyń ishinde «Omby-Maıqapshaǵaı» tas jolynan «Severnyı» SLO-ǵa deıingi avtojol salyndy, Shákenov kóshesinde kópir salynyp, Aıagóz qalasyndaǵy Baraq batyr kóshesindegi kópir qaıta jańǵyrtylǵan.

Normatıvtik jaǵdaıdaǵy joldardyń úlesin jyl sońyna deıin 90%-ǵa, 2025 jylǵa qaraı – 97%-ǵa jetkizý josparlanyp otyr. 

«Keshendi josparǵa sáıkes, 2024-2025 jyldary kólik dálizin keńeıtý úshin 270 shaqyrym bolatyn «Baqty-Aıagóz» temir jolynyń qurylysy josparlanǵan. Onyń tehnıkalyq-ekonomıkalyq negizdemesine saraptamanyń oń qorytyndysy alyndy. Osy oraıda ákimdik temirjol salýǵa arnaıy jerlerdi belgilep, rezervke qoıdy. Jobany iske asyrý Qytaı Halyq Respýblıkasymen ekijaqty temirjol tasymaly kóleminiń jyldyq mólsherin, 20 mln tonnaǵa deıin ulǵaıtýǵa múmkindik beredi», - deıdi Nurlan Uranhaev.

Aıta keteıik, Prezıdent tapsyrmasymen Semeı qalasyn damytýdyń Bas josparyn ázirleý jumystary júrip jatyr.

Qart Semeıdiń keskin-kelbetin jaqsartý, turǵyndarǵa jaıly orta qalyptastyrý baǵytynda da jumystar úzdiksiz atqarylyp keledi.