Semeıdegi kóne kópes úıiniń ǵımaraty buzylmaıtyn boldy
Oblystyq mamandandyrylǵan aýdanaralyq ákimshilik sotynyń málimetine súıensek, ǵımarat ıesiniń Abaı oblysy ákimine 1844 jyly salynǵan kópes úıin jergilikti mańyzy bar tarıhı jáne mádenı eskertkishter tizimine engizý týraly qaýlysynyń kúshin joıý jáne zańsyz dep taný týraly talap aryzy boıynsha ákimshilik is qaraldy.
«Kópes úıiniń ǵımaraty tarıhı-mádenı mura obektisi retinde 2021 jyldyń 5 mamyrynda alǵash ret tirkeýge alynǵan. QR Mádenıet jáne sport mınıstrligi janyndaǵy arnaıy komıssııanyń 2021 jylǵy 22 maýsymdaǵy hattamalyq sheshimimen Shyǵys Qazaqstan oblysy ákimi orynbasarynyń haty jáne tıisti qorytyndy negizinde bul ǵımaratqa mádenı-tarıhı eskertkish mártebesi berildi», - delingen habarlamada.
Oblys ákiminiń qaýlysymen atalǵan nysan kiretin jergilikti mańyzy bar tarıhı jáne mádenı eskertkishter tizimi bekitilgen.
«Sot 1844 jyly salynǵan saýda úıin jergilikti mańyzy bar tarıhı jáne mádenı eskertkishter tiziminen shyǵarý týraly talap aryzdy qanaǵattandyrýsyz qaldyrdy. Ákimdik bul qadamǵa arnaıy komıssııanyń sheshimi negizinde zańdy túrde barǵan. ıAǵnı, nysanǵa mádenı-tarıhı eskertkish mártebesin berý tártibi tolyqtaı saqtalǵan», - delingen aqparatta.
Sot úkimi áli zańdy kúshine engen joq.
Eske salsaq, 2021 jyldyń jazynda Naımanbaev kóshesi, 187 mekenjaıyndaǵy eski záýlim úıdi menshik ıesi buzbaq bolǵan. Osylaısha, ǵımarat qabyrǵasynyń bir bóligi qıraǵan. Sol kezde kórshi úıdiń turǵyndary dabyl qaqqan edi. Olardy qoǵam belsendileri de qoldaǵan.