Semeıde jylýmen qamtýdaǵy qordalanǵan máseleler qalaı sheshilýde

SEMEI. QazAqparat – Semeı qalasynda jylýmen qamtýdaǵy qordalanǵan máselelerdi sheshý úshin birqatar sharalar qolǵa alynǵan, dep habarlaıdy QazAqparat tilshisi.

Bul jaıly Aqparat ortalyǵynda ótken baspasóz máslıhaty barysynda shahar ákimi Baqytjan Baıahmetov aıtyp berdi.

«Jylýmen qamtamasyz etýdegi máselelerdi sheshý úshin bıyl 1,4 mlrd teńge bólingen. Onyń ishinde jylýmen qamtamasyz etý nysandaryna aǵymdaǵy jóndeý júrgizýge – 1,2 mlrd teńge, qazandyqtardy jáne jylý júıesin rekonstrýktsııalaýdyń jobalyq-smetalyq qujattamasyn ázirleýge – 247,8 mln teńge jumyldyrylǵan. Atap aıtqanda, olar – Ortalyq, Ǵabbasov, 103, 103A, 35-kvartal, Mal-dárigerlik ınstıtýty qazandyqtary, Fızkýltýrnaıa, Bı Boranbaı kóshelerindegi jylý júıeleri», - dedi ol.

Osy jobalardyń júzege asyrylýy jylýmen qamtýdaǵy qıyndyqtardy sheshýge múmkindik beredi. Qazandyqtyń tıimdiligi 3%-ǵa kóterilip, qýattylyǵy saǵatyna 140 Gkall-ǵa artady. Sondaı-aq Qaraǵaıly yqsham aýdanyn jylýmen qamtamasyz etý úshin RK-3 qazandyǵy qurylysynyń ekinshi kezeńi aıaqtalǵan. Osylaısha, qýattylyq saǵatyna 41,95-ten 70 Gkall-ǵa ósedi.