Semeıde jylý jelileriniń 62 paıyzy tozǵan

SEMEI. QazAqparat – Semeı qalasynda jylý jelileriniń 62 paıyzy tozǵan, dep habarlaıdy QazAqparat tilshisi.

Abaı oblysy ákimdigi baspasóz qyzmetiniń málimetine súıensek, bıyl Semeıde jylytý maýsymy 29 qyrkúıek kúni bastalǵan.

Bilim nysandarynyń 73 paıyzy, medıtsınalyq mekemelerdiń 85 paıyzy jylýǵa qosyldy.

Turǵyndardyń jylý berý mekemesi aldynda 73 mln teńge qaryzy bar.

«Jylýkommýnenergo» MQK basshysy Serik Túlenbergenovtiń aıtýynsha, osy aptanyń aıaǵynda Semeı qalasy jylýǵa tolyq qosylady dep josparlanǵan.

- Qazirgi tańda qaladaǵy nysandardyń 95 paıyzy jylýǵa qosylýǵa daıyn. Jylý jelileriniń 62 paıyzynyń tozyǵy jetken. Soǵan qaramastan, qysta turǵyndardyń jaılylyǵy úshin bar jaǵdaıdy jasaýǵa tyrysamyz, - dedi ol.