Semeıde jylý qubyrlarynyń 68 paıyzy tozǵan

SEMEI. QazAqparat – Semeı qalasynda jylý jelileriniń 68 paıyzy tozǵan, dep habarlaıdy QazAqparat tilshisi.

Qala ákimdiginiń málimetine súıensek, qazirgi ýaqytta Semeıde jylytý maýsymyna daıyndyq jumystary qyzý júrgizilýde. Búginde shahardaǵy jylý qubyrlarynyń 68% tozyp tur.

«Semeıdegi eń ózekti máselelerdiń biri – jylý jelisiniń eskirgendigi. Bıyl 45 shaqyrym jylý jelisine jóndeý jumystaryn qolǵa aldyq. 9 ýchaskede jóndeý jumystary júrgizilip, jylytý maýsymyna daıyndyq bekitilgen kestege sáıkes júzege asyrylýda», - dedi qala ákimi Nurbol Nursaǵatov

Ótken jyly qaladaǵy jylý qubyrlarynda birneshe ret apat bolǵan edi. Jospar boıynsha bıylǵy jóndeý jumystary nátıjesinde jylý jelilerindegi apattar 15 paıyzǵa azaıady.

«Qazirgi kezde 60 paıyzdan astam jumys aıaqtaldy. Materıaldardyń barlyǵy jetkizildi. Atqarylyp jatqan jumystar ákimdik baqylaýynda. Qarajat respýblıkalyq jáne rezervtik bıýdjetten bólingen», - dedi N.Nursaǵatov

Onyń aıtýynsha, jylytý maýsymynyń basyna qaraı «Ǵabbasov» jáne «Tsentr» qazandyqtaryn qaıta jańǵyrtý aıaqtalady dep josparlanyp otyr. Qazirgi tańda eki qazandyqta jumystyń 80% oryndaldy.