Semeıde jyl sońyna deıin jalǵasatyn qaıyrymdylyq aktsııa bastaldy
Elbasynyń «Rýhanı jańǵyrý: Bolashaqqa baǵdar» maqalasyn júzege asyrý maqsatynda Qazaq ınnovatsııalyq gýmanıtarlyq - zań ýnıversıtetiniń stýdentterinen quralǵan eriktiler toby jáne «Aq nıet» qaıyrymdylyq qorynyń uıymdastyrýymen «Jyly júrek - jomart qol» atty qaıyrymdylyq aktsııasy bastaldy. Aktsııa jyl sońyna deıin jalǵasady. Kez-kelgen qala turǵyny aqshalaı kómekten basqa balalar kıimi, keńse zattary, oıynshyqtardy syılaý arqyly aktsııaǵa qatysa alady. Osylaısha uıymdastyrýshylar ata-analarynyń qamqorlyǵynsyz qalǵan balalarǵa kómek kórsetpek.
Búginde ýnıversıtet oqytýshylary men stýdentteri múmkindikterinshe qarjylaı jáne zattaı kómek jınap jatyr. Keıin qaladaǵy balalar úılerine arnaıy kontserttik baǵdarlama uıymdastyryp, saltanatty túrde tabystaýdy josparlap otyr. Eger aktsııa kópshilik tarapynan qoldaý tapsa ary qaraı jalǵasyn tappaq.
«Qaıyrymdylyq aktsııasynyń maqsaty - jastardyń boıyna rýhanı tárbıeni sińire otyryp, qaıyrymdylyqqa baýlý, adamgershilik qasıetin arttyrý. Sebebi, qazirgi qoǵamda materıaldyq kómekke zárý balalarǵa kómek kórsetý ǵana emes, múmkindigi bar azamattardyń boıynda kómek qolyn sozýǵa árqashan daıyn bolý sezimin qalyptastyrý. Aktsııa jastarǵa jáne qoǵamnyń barlyq múshelerine meıirimdilik sezimin uıalatatynyna senimdimin»,-deıdi Qazaq ınnovatsııalyq gýmanıtarlyq - zań ýnıversıtetiniń PhD doktoranty Aırat Bazenov.