Semeıde jolaýshylar qoǵamdyq kólikterde hákim Abaıdyń naqyl sózderin oqı alady

SEMEI. QazAqparat - Semeıdegi qoǵamdyq kólikterde hákim Abaıdyń naqyl sózderi paıda boldy, dep habarlaıdy QazAqparat tilshisi Abaı oblystyq ákimdiginiń resmı saıtyna silteme jasap.

Sonymen qatar, avtobýs ishine kitap sóreleri ornalastyryldy. Sórede «Osy kitaptar Sizge arnalǵan», «Siz de kelesi jolaýshyǵa kitap syılańyz!» degen nusqaýlyq bar. Jolaýshylar sóredegi kitapty sapar barysynda ǵana oqı alady. Ony ózimen birge alyp ketýge bolmaıdy. Tek ózge jolaýshyǵa tabystaýǵa nemese sórege qaıta qoıýǵa bolady.

«Danalyq izimen» aktsııasy aıasynda qolǵa alynǵan sharanyń maqsaty turǵyndardy danalyqqa baýlý, bilimge shaqyrý, kitap oqýǵa degen mahabbatyn oıatý», - deıdi Abaı oblystyq mádenıet basqarmasynyń basshysy Aıdar Ibraev.

Onyń aıtýynsha, ıgi bastama qoǵamdyq kólik júrgizýshilerine de, qala turǵyndaryna da óz paıdasyn tıgizip, rýhanı baılyǵyn arttyra túspek.

Aıta ketý kerek, búginge deıin 6 avtobýs bezendirilip, 60 kitap jınalǵan. Aldaǵy ýaqytta avtobýstar men kitaptardy kóbeıtý josparlanyp otyrǵan kórinedi.

Esterińizge salsaq, aǵymdaǵy jyldyń naýryz aıynda Semeıde №1 jáne №36 baǵyttar boıynsha 25 oryndyq, syıymdylyǵy 50 jolaýshyǵa arnalǵan 12 jańa avtobýs qoldanysqa berilgen bolatyn.

Berdibek Qarynbaı