Semeıde JEO salý úshin tehnıkalyq-ekonomıkalyq negizdeme daıyndaý bastaldy
Abaı oblysy ákimdiginiń aldyn ala derekterine sáıkes, qalanyń ortalyq jylý elektr júıesi 320 MVt elektr qýatyn jáne saǵatyna 1,2 myń Gkal jylý óndirýi tıis. Degenmen, qorytyndy sıpattamalar TEN ázirleý barysynda anyqtalady.
«Oblys ortalyǵy mártebesin alǵan Semeı qalasynda ınfraqurylym máselesi óte ózekti. Jańa JEO salý óńirdiń áleýmettik-ekonomıkalyq damýynyń keshendi jospary aıasynda júzege aspaq. Qoldanystaǵy jylý ortalyqtarynyń áleýeti qalanyń oń jaǵalaýyn tolyq jylýmen qamtamasyz etýge jetpeıdi. Oblys ortalyǵynyń jańa mártebesinde qalany damytý múmkindigin qamtamasyz etý úshin jańa jylý kóziniń qurylysyn bastaý qajet», - dep túsindirdi «Samuryq-Energo» AQ.
Abaı oblysynyń energetıka jáne turǵyn úı-kommýnaldyq sharýashylyǵynyń aqparatyna sáıkes, qazirgi ýaqytta tehnıkalyq-ekonomıkalyq negizdemeni daıyndaýshy uıym anyqtalǵan. «2023 jyly 17 aqpanda 2022 jylǵy jeltoqsanda jarııalanǵan konkýrstyń nátıjeleri boıynsha alty ónim berýshiniń ishinen»Stroıındýstrııa«JShS jeńimpaz retinde anyqtaldy», - dedi basqarma ókilderi.
Esterińizge salsaq, ótken jyldyń qyrkúıek aıynda memleket basshysy Qasym-Jomart Toqaev Abaı oblysyna sapary aıasynda Semeı qalasynda zamanaýı jylý elektr ortalyǵyn salý jáne ınfraqurylymdy jańartý máselesin qarastyrýdy tapsyrǵan bolatyn.
Al oblys ortalyǵynda jańa JEO salý jáne qoldanysqa berý máselesi aldaǵy ýaqytta belgili bolmaq.