Semeıde JEO qurylysyna 500 mlrd teńge qajet - oblys ákimi

SEMEI. QazAqparat – Semeıde jańa Jylý elektr ortalyǵyn salýǵa 500 mıllıard teńge qajet. Bul týraly óńir ákimi Nurlan Uranhaev málim etti, dep habarlaıdy QazAqparat tilshisi.

Abaı oblysy ákimdiginiń málimetine súıensek, Nurlan Uranhaev jýrnalıstermen kezdesý barysynda Semeı qalasyn kútip turǵan birqatar aýqymdy ózgeristi sóz etti.

«Semeıdegi Jylý elektr ortalyǵynyń qurylysyna 500 mıllıard teńge qajet. Abaı oblysy arqyly Qytaıǵa ótetin temirjol salýǵa da osynshama derlik qarajat jumsalady. Óńirdiń keshendi jospary jáne Semeı qalasynyń bas jospary boıynsha mádenı-tarıhı muralardy saqtaý jumystary bastaldy. Qazir kóne ǵımarattardyń taǵdyry sheshilýde. Máselen, Semeıde sonaý 1890 jyly kópester salǵan alǵashqy bý dıirmeni saqtalǵan», - dedi ol.

Nurlan Uranhaev óz sózinde Ertis arqyly taǵy bir kópir salynatynyn, Semeı qalasynyń sol jaǵalaý bóliginde jaǵalaý salý josparlanǵanyn jetkizdi.

«Sondaı-aq birneshe zaly bar Muz saraıyn salý josparlanýda. Jańa teatr salý da kózdelip otyr. Óıtkeni qazir qaladaǵy úsh teatr ujymy bir ǵımaratta jumys isteýge májbúr», - dep bólisti óńir basshysy.